Кечкенә рыцарьлар турниры үтте

Спорт бәйрәменә районда яшәүче сәламәтлеге торышы буенча мөмкинлекләре чикле булган малайлар чакырылды. Чарада катнашучыларны муниципаль район хакимиятенең мәгариф бүлеге методисты Рәилә Рәхимҗанова һәм Балалар-үсмерләр спорт мәктәбе директоры урынбасары Эльвира Хәлилова сәламләде.

Чара зарядка эшләнүдән башланды. Аны халыкара класслы спорт мастеры, кадетлар арасында ирекле көрәш буенча Европа беренчелеге призеры, спорт мәктәбе тренер-укытучысы Мөршид Мөталимов үткәрде. Балалар-үсмерләр спорт мәктәбе коллективы  кечкенә рыцарьлар өчен эстафета формасындагы кызыклы уеннар оештырды. Малайлар төрле уеннарда бик актив катнаштылар, ә көярмәннәр аларны дәртләндереп, хуплап торды.

Эстафета нәтиҗәләре буенча дуслык җиңде. Чөнки нәкъ менә дуслык кешеләрне берләштереп, җирдәге тынычлыкны саклый. Чара ахырында турнирда катнашучыларга бүләкләр тапшырылды.