+20 °С
Облачно
Авыл хуҗалыгы
20 Мая , 05:35
Борайда эшлекле очрашу
Республика Башлыгы Радий Хәбиров җитәкчелегендә республиканың агросәнәгать комплексы тотрыклы рәвештә алдынгылар рәтендә бара.«Көчле агросәнәгать комплексы – ул безнең республикада чын-чынлап горурланырлык тармак. Безнең халыкның кырык процентка якыны авыл җирлегендә яши. Анда агросәнәгать комплексы икътисад үсешенең этәргече булып тора. Төбәктә авыл хуҗалыгы техникасы паркын яңартуга аерым игътибар бирәбез. Яңа алымнар, заманча технология белән үсемчелек һәм малчылык тармакларын үстерәбез».Башкортстан Республикасы Башлыгы Радий Хәбиров. Узган ел йомгаклары буенча Башкортстан аграрийлары башка еллар белән чагыштырганда 290 миллиард сумнан артык продукция җитештергән. Төп өлеш товар секторында сакланган. Катлаулы һава шартларына карамастан, игенчеләр 3,8 миллион тонна ашлык җыйганнар. Бигрәк тә майлы культуралар җитештерү буенча югары күрсәткечләргә ирешкәннәр. Шулай ук шикәр чөгендереннән рекордлы уңыш алынган. Төбәктә файдаланылмый торган авыл хуҗалыгы җирләрен әйләнешкә кертү буенча эш дәвам итә. Узган ел авыл хуҗалыгы әйләнешенә 33 мең гектардан артык файдаланылмый торган чәчүлек җирләре җәлеп ителгән. Башкортстанда тулаем терлекчелек продукциясен җитештерү узган елда 166,3 миллиард сум тәшкил иткән. Төбәктә 780 мең тоннага якын товар сөте җитештерелә. Сөт терлекчелегендәге уңышлар тармакны индустрияләштерү белән бәйле. Башкортстанда 25 индустриаль сөт фермасы җәмәгать секторында барлык сөтнең 48 процентын җитештерә. 2030 елга тагын 25 шундый объект төзү планлаштырыла. Республикада җитештерелгән һәм үстерелгән продукциянең сыйфатына һәм эскпортлауга аерым игътибар бирелә. Республика аграрийларының азык-төлекнең күп төрләре халык куллану белән чагыштырганда 1,5 тапкыр күбрәк җитештерелүен исәпкә алып, төбәкнең аграр секторы эчке базар белән генә чикләнми һәм экспортны арттыруда чыгу юлын күрә. Соңгы биш елда аграр экспорт ике тапкыр арткан. Аграрийлар яңа сату базарларын үзләштерү юнәлешендә актив эшлиләр.“Агросәнәгать комплексында кадрлар” проекты кысаларында узган ел Башкортстанда федераль бюджеттан 950 миллион сум акча җәлеп ителгән. Федераль акчаларны җәлеп итү күләме буенча республика илдә икенче урынны алды. Быел шул ук максатларга 1,2 миллиард сумлык гариза бирелгән. Бу акчаларны аграр университет корпусларын ремонтлауга һәм җиһазлауга, өч мәктәптә агрокласслар оештыруга, аграр колледжларның матди-техник базасын ныгытуга юнәлдерү планлаштырыла.
Борайда эшлекле очрашу
Шушы проект буенча безнең районда да күп кенә эшләр алып барыла. Узган атнада эш сәфәре белән килгән Башкортстан Рес-публикасы Премьер-министры урынбасары – авыл хуҗалыгы министры Илшат Фазрахманов бу проект турында сөйләде һәм район объектлары буенча йөреп чыкты. Аны сәфәр барышында район хакимияте башлыгы Рушан Гәрәев һәм авыл хуҗалыгы идарәлеге начальнигы Ильвер Нурмөхәмәтов озатып бардылар.
Илшат Илдус улы алдынгы хуҗалыкларның берсе – “Колос” хуҗалыгында булды. Заманча, куәтле чәчү комплексында эшләүче механизатор Сергей Сайранов белән әңгәмә корып, язгы кыр эшләре барышы белән танышты. Хуҗалык җитәкчесе Камил Галиев белән сөйләшү барышында авыл хуҗалыгының актуаль мәсьәләләре турында фикер алышты. Аннары делегация “Колос” хуҗалыгы базасындагы басулардагы эш барышы белән якыннан танышты.
Артабан делегация вәкилләре эксперименталь басу мәйданына юл алдылар. Бу төрле авыл хуҗалыгы культураларының уң-дырышлылыгын өйрәнү, перспективалы төрләрен сайлап алу һәм район хуҗалыкларын яңа, тагын да уңышлырак орлыклар белән тәэмин итү максатында булдырылган эксперименталь үсентеләр басуы.
Моннан соң авыл хуҗалыгы идарәлегендә “Агросәнәгать комплексында кадрлар” федераль проекты кысаларында Борай өченче санлы урта мәктәбе, Башкорт дәүләт аграр университеты һәм “Победа” җәмгыяте арасында Агротехнологик класс оештыру турында килешүгә кул куелды.
Илшат Илдус улы район-ның Көнчыгыш микрорайонында яңа мәктәпнең төзелеш мәйданчыгында да булды. 500 укучыга исәпләнгән өч катлы мәктәп үз эченә уку кабинетларын, иҗтимагый-административ, медицина, азык-төлек, ярдәмче бүлмәләрен, китапханә, ашханә, актлар һәм спорт залларын, тир һәм хез-мәт кабинетын үз эченә алачак. Мәктәп төзелеше тулы көчендә бара, 2027 елда аны тәмамлау планлаштырыла. Авыл хуҗа-лыгы министры Илшат Фазрахманов төзелеш турында ныклап кызыксынып, эш барышы турында сорашты.
Делегация шулай ук Шабай авылында “Агросмарт” җәм-гыятенең элеваторы төзелеше белән дә танышты. Очрашу барышында Илшат Илдус улы аграрийлар белән агымдагы вәзгыять турында сөйләште, тәкъдимнәрен тыңлады һәм чәчү процессында барлыкка килә торган мәсьәләләрне эшкә алды. Гомумән алганда, районда чәчү кампаниясе планлы режимда бара, дип билгеләп үтелде.
“Районда агросәнәгатьне үстерүгә Республика Башлыгы Радий Хәбировның ярдәме зур. Бигрәк тә фермер хуҗалыкларга күп төрле дәүләт ярдәме бар. Шулай ук төрле программалар нигезендә техника парклары яңартылды. Район территориясенә инвесторларның керүе дә авыл хуҗалыгы тармакларын үстерүдә зур роль уйный”.
Авыл хуҗалыгы идарәлеге начальнигы
Ильвер Нурмөхәмәтов.
