Игенче сабан эшенә әзер

Аның эшендә авыл хуҗалыгы предприятиеләре җитәкчеләре, крестьян-фермер хуҗалыклары башлыклары, авыл биләмәләре башлыклары, авыл хуҗалыгы идарәсе һәм “Россельхозүзәк” белгечләре катнашты. Район аграрийлары алдагы чәчү кампаниясенең стратегиясе һәм тактикасы турында фикер алыштылар. Җыелганнарга сәламләү мөрәҗәгате белән чыгыш ясап, хакимият башлыгы урынбасары – районның авыл хуҗалыгы һәм авыл территорияләрен үстерү идарәсе башлыгы Ильвер Нурмөхәмәтов алдагы чәчү кампаниясенә район аграрийлары алдына куелган бурычларны билгеләде. 
– Басучылыкта мул табыш алу өчен элиталы орлык, тиешле минераль ашлама һәм чүпләргә каршы көрәшне дөрес оештырырга кирәк. Бу эшләргә һәр хуҗалык җитәкчесе тиешле дәрәҗәдә җаваплы карарга тиеш. Авыл хуҗалыгы продукциясен җитештерүчеләргә район хакимияте ярдәм итеп тора. Бу елны Курган орлык заводы белән килешү нигезендә безнең район басуларында махсус орлыкларны сынау делянкасы утыртылачак. Киләсе елда шушы тәҗрибә нигезендә район басуларына яраклы орлыклар утырту өстендә эш алып барылачак, – диде ул.
Чакырылган кунаклар – «Щелково Агрохим» җәмгыя-тенең Уфа вәкиллеге начальнигы урынбасары, авыл хуҗалыгы фәннәре докторы Радик Гайфуллин, «Россельхозүзәк»нең БР буенча филиалы җитәкчесе Айдар Хәмәтшин, «Башкирская» агрохимүзәгенең» агроэкология мониторингы бүлеге начальнигы Татьяна Иванова, «Агрохимия» җәмгыятенең Уфа шәһәре бүлекчәләренең сатулар буенча менеджеры Азат Ахунҗанов, Россельхознадзорның Башкортстан Республикасы буенча идарәсенең дәүләт инспекторы Илгиз Гатауллин да чыгыш ясап, бик күп файдалы киңәшләрен һәм тәкъдимнәрен бирделәр. Шулай ук агроконференция эшендә район хакимияте башлыгы Рушан Гәрәев катнашты. Ул районның агросәнәгать комплексы системасында күпь-еллык намуслы хезмәтләре өчен җитештерү алдынгыларын район хакимиятенең Мактау грамоталары белән бүләкләде. Һәм агымдагы елда районда малчылык тармагын үстерү өчен нәселле үгезләр кайтартылачагы турында да әйтеп китте.  
Конференциядә катнашучылар, кызыксынып, докладчыларны тыңладылар, агымдагы елда язгы кыр эшләрен уздыру, шулай ук башка мөһим мәсьәләләр турында фикер алыштылар.