Хөрмәт – иң зур бүләк

Мин килгәндә Оксана сыер торакларында көндәлек эш белән мәшгуль иде. Башта сөтлебикәләрне утардан кертәләр, аларга су салалар, ашаталар, асларын кыралар, аннары савымга керешәләр. Савылган сөт махсус торбалар буйлап суыткычка үтә.
Сыер савучыларның эшен бүген заманча җиһазлар шактый җиңеләйтә җиңеләйтүен. Әмма барыбер бу хезмәттә физик көч тә, ныклы сәламәтлек һәм түземлек тә кирәк. Саву аппаратлары кулланылса да, кул хезмәтеннән башка барыбер булмый. Эш урынын, саву механизмнарын чисталыкта тоту да кирәк бит.
Оксана тумышы белән Свердловск өлкәсеннән. Мәктәпне бетерү белән әнисенә ияреп фермага сыер саварга йөри башлый һәм шунда эшкә кала. Мамады авылына килен булып төшү белән элеккеге “Дэмен” хуҗалыгына сыер савучы булып эшкә башлый. Хуҗалык таралгач, “Колос” хуҗалыгының Әҗәк бүлекчәсендә эшен дәвам итә. Аннан инде шушы хуҗалыкның Борай бүлекчәсе сөтчелек фермасына күчә.
– Оксана Кулигина хуҗалыкның алдынгы эшчеләренең берсе. Үз эшенә җаваплы карап, җиренә җиткереп башкара, – ди хуҗалык идарәчесе Айдар Рәхимов.