Игенче язгы чәчүгә әзерләнә

Техника – басу хуҗасы, дип бер дә юкка әйтмиләр, чөнки авыл хуҗалыгы кампанияләренең вакытында башкарылуы һәм ахыргы нәтиҗәләр – уңыш аның әзерлегенә, яхшы итеп ремонтлануына, бер сүз белән әйткәндә, куәтенә бәйле. Аларны әзерләү бүгеннән тулы көченә алып барылса гына, игенче басуларга вакытында чыга ала. Әлеге хакыйкатьне истә тотып, район хуҗалыклары мастерскойларында тракторлар, тагылма инвентарьләр, гомумән, язгы чәчүдә катнашачак техниканы ремонтлау башланды.
Бу җәһәттән “Гайфутдинова” крестьян-фермер хуҗалыгы эшчәннәре дә сынатмый. Алар һәр елдагыча урып-җыюны вакытында тәмамлап, уңышны югалтуларсыз җыеп алды. Биредә көзге эшләрнең иң соңгыларыннан булган җирләрне туңга сөрү кампаниясе дә тәмамланып, техника машина-трактор паркларына кайтарылды. Хуҗалык барлык төр басу эшләрен фәкать үз техникасы ярдәмендә, үз механизаторлары белән башкарып чыккан.
Әлеге вакытта төп көч техника ремонтына юнәлтелгән.
– Хуҗалыкта техника ремонты белән беррәтттән тагылма җир эшкәртү, чәчү, тырма агрегатларын сыйфатлы итеп ремонтлауга һәм бөтен таләпләргә туры китерерлек итеп саклауга куюга зур игътибар бирелә. Механизаторлар Фидаил Галимов һәм Венер Корбанов бу эшкә иң беренчеләрдән булып тотындылар. Бүгенге көнгә аларның техникасы алгы сызыкка куелды. Бездә күпчелек заманча, куәтле техника. Шуңа күрә аларга ремонт эшләрен махсус сервис хезмәткәрләре килеп башкара. Әлегә безнең хуҗалыкта тырма ремонты да бик оешкан төстә бара. Ике агрегат тырма ремонтын эшлибез, – ди хуҗалык идарәчесе Рөстәм Шаһиәхмәтов.