Үз эшенең остасы

Үз эшен биш бармагы кебек белгән белгечләрне хезмәттәшләре дә, җитәкчеләр дә хөрмәт итә. Авыл хуҗалыгы идарәлегендә баш икътисадчы булып эшләп ихтирам казанып, бүгенге көндә начальник урынбасары вазыйфасын биләүче Ришат Муллагалиев та нәкъ шундыйлардан.
Хезмәт тәрбиясенә нигез, иң беренче чиратта, гаиләдә салына. Ул тырыш, эшчән гаиләдә дөньяга килә. Ришат Тәлгат улы бәләкәйдән эшсөяр, җаваплы һәм таләпчән егет булып үсә. Мәктәптә тик яхшы билгеләргә генә укый, активист була.
– Һөнәремне очраклы гына сайладым. Мин авиация институтында укырга хыялландым. Мәктәпне тәмамлагач, шунда документларымны тапшырдым. Зур шәһәргә килгәч ничектер югалып калдыммы, үз көчемә ышанып җитмәдемме, укый башлагач, үз теләгем белән армия сафына бастым. Хәрби хезмәтемне тәмамлап, Борайга кайттым. Армиядән соң тормышка карашым үзгәреп китте. Мин икътисадчы булырга уйлап, Казан социаль һәм гуманитар белем институтына читтән торып укырга кердем, – дип, кыскача гына үзенең тормыш юлын чагылдырып китте Ришат Муллагалиев.
Аның эш тәҗрибәсе бай. Аңа зур өметләр баглана һәм ул аны намуслы хезмәте белән аклый. Аның турында хезмәттәшләре дә бик җаваплы хезмәткәр, эштәге һәр бурычны үтәүгә, хәтта турыдан-туры үзенең эшчәнлегенә кагылмаганнарына да, бик җитди карый диләр. Үтә җаваплы, четерекле хезмәт аеруча төгәллек таләп итә. «Аның исәп-хисаплары һәрвакыт төгәл була. Ул үз эшенең остасы да, безнең өчен остаз да, бик кешелекле, һәрвакыт ярдәм кулы сузарга әзер. Авыл хуҗалыгы идарәлегендә бөтен субсидия алу эшләре, документлар белән идарә итү аның аша уза», – диләр.
– Кайда гына эшләсәм дә, һәрчак яхшы күңелле, эшсөючән, җаваплы, намуслы кешеләр белән эшләргә насыйп итте. Бу юлы да коллективтан, җитәкчеләрдән уңдым. Әлеге хезмәтемдә кешеләр белән еш аралашырга туры килә, бик күп фермерлар, авыл хуҗалыгы предприятиеләре җитәкчеләре ярдәм сорап мөрәҗәгать итә. Аларның сорауларына җаваплар, киңәшләр бирәбез, киңәшмәләр үткәрәбез, проблемаларын бергәләп хәл итәргә тырышабыз. Кешеләргә ниндидер файда китерә алуым күңелгә шатлык өсти. Эшемнән бик канәгатьмен, – ди ул.
Ришат Муллагалиев эштә генә түгел гаиләсендә дә үрнәкле ир, кайгыртучан әти. Тормыш иптәше Анастасия белән бер кыз, бер ул тәрбияләп үстереп, аларның уңышларына куанып яшиләр.