+21 °С
Болытлы
Авыл хуҗалыгы
25 июль 2024, 06:19
Кышны хәстәрләп
– Мал азыгын хәзерләү тулы көченә бара. Әлегә ферма янына 600 рулон печән кайтарып куйдык. Күпьеллык үлән басуларын беренчегә чабып алдык. Көннәр әйбәт, икенче чабым да җитешер дип торабыз. Болай безнең мал башы санына 1000 рулон печән булса кышны иркен чыгабыз. Печәннән тыш, силос да салына. Әлегә механизаторлар 35 гектар җирдә бозаулар өчен болын печәнен чабуда эшлиләр. Болын печәне йомшак бит инде, шуңа аны тик бозаулар өчен генә тотабыз, – ди “Фәйзрахманова” крестьян-фермер хуҗалыгы башлыгы Луиза.
Кышны хәстәрләп
Хуҗалыкта эшләр гөрләп, бер чылбырга тезелгән сыман бара. Быел беренче тапкыр силос салу өчен берьеллык судан үләне үстергәннәр. Ел әйбәт килсә бу культураны өч тапкыр да җыеп алырга була икән. Бу үләннең яшел массасы аксымга, шикәргә һәм көлгә бай. Бу культураны силос әзерләү өчен кулланалар. Судан үләне силосы туклыклылыгы буенча кукуруз силосыннан калышмый диярлек. Кукуруз культурасын җыеп алу кайбер хуҗалыкларга уңайсызлык тудыра, шуңа күрә судан үләне үстереп, шундый ук сыйфатлы мал азыгы хәзерләп була икән. Хуҗалык уңганнары силос салу белән арыш урагына да төшәргә әзерләр. Ай ахырына урак эшенә дә тотынырбыз дип уйлап торалар.
