+30 °С
Болытлы
Авыл хуҗалыгы
25 гыйнвар 2024, 11:49
Маллар кышлату дәвам итә
Бигәнәй авылыннан крестьян-фермер хуҗалыгы башлыгы Динарик Шакировны фермада очраттык.– Кышкылыкка әзерлек белән кердек, мал торакларына үз вакытында тиешенчә ремонт эшләре башкарылды, территорияләр тирестән тазартылды, стеналар агартылды, буялды, дезинфекция үткәрелде. Бүген безнең иң зур омтылыш – кышлатуны мөмкин кадәр уңышлы үткәрү һәм малларның продуктлылыгын эзмә-эзлекле арттыра бару, аларны төрле чирләрдән, өзлегүләрдән саклау. Шуңа да ашату технологиясенең төгәл үтәлүен, малларның вакытында эчерелүен һәм саф һавада йөртелүен, исәпнең дөрес алып баруын да онытмаска кирәк, – дип сөйләде ул.
Маллар кышлату дәвам итә
Фермер сөт савып алу өчен кара-чуар токымга өстенлек бирә. Кышкы чорда савымнар кими, шуңа карамастан, район халкын сөт белән өзлексез тәэмин итәргә тырышалар.
– Коллективыбыз зур түгел, барлыгы 5-6 кеше. Әмма һәркем үз эшен яхшы белә. Сыер савучыларның эшен бүген заманча җиһазлар шактый җиңеләйтә җиңеләйтүен. Әмма барыбер бу хезмәттә физик көч тә, ныклы сәламәтлек һәм түземлек тә кирәк. Саву аппаратлары кулланылса да, кул хезмәтеннән башка барыбер булмый. Эш урынын, саву механизмнарын чисталыкта тоту да кирәк бит. Авыр хезмәтенә карамастан, саву операторлары Динара Әгаләмова белән Альбина Таипова яхшы эшлиләр. Терлекчеләр агалы-энеле Илвир белән Вилнарис Әхияровлар да алардан калышмый. Алар ел әйләнәсенә малларны асрауда күп көч сала. Терлекләрнең асларын алу, ашарга салу, башка вак-төяк эшләр дә аларга йөкләтелгән, – ди Динарик Нәзир улы.
Фермер хуҗалыгы – ул бетмәс-төкәнмәс мәшәкатьләр һәм зур хезмәт. «Бездә яллар юк, чөнки маллар эш көннәрендә генә түгел, ә көн саен ашарга тели», – дип елмаеп, сүзенә йомгак ясады хуҗалык башлыгы.
Гөлназ Хуҗина фотосы.
