+24 °С
Яңгыр
Авыл хуҗалыгы
22 ноябрь 2023, 04:55
Хезмәтенә күрә хөрмәте
Беркемгә дә сер түгел, колхозлар таркалгач, күпләр эшсез калды. Эшсез генә түгел, төшенкелеккә бирелеп, үзләрен җиде юл чатында торып калган кебек хис иттеләр. Шул ук вакытта билгесезлектән чыгу юлын табып, җиң сызганып, үз эшләрен башлап җибәрүчеләр дә булды. Шуларның берсе – Чишмә-Борай авылыннан Фируза Хәлилова. 1999 елда ит җитештерү һәм сату буенча үз эшен ача ул, 2019 елда “Агростартап” максатчан программасында катнаша һәм алынган грант акчасына герефорд токымлы 22 баш тана һәм “Беларусь 82” тракторын сатып алуга ирешә.
Хезмәтенә күрә хөрмәте
Фируза Хәлилова үзенең хезмәт эшчәнлеген 1986 елда педагогия институтын тәмамлаганнан соң ук укытучы вазыйфасында башласа да, авыл тормышы аны фермер хуҗалыгына бөтен гаиләсе белән үк тартып ала. Тормыш иптәше Илшат һәм балалары белән хуҗалыкта эре мөгезле эре терлек үрчетәләр һәм бөртекле культуралар үстерәләр. Хәзерге вакытта эре мөгезле терлекләрнең баш саны 102не тәшкил итә, сыерлар саны 55. Бөртекле, кузаклы һәм азык культуралары 366 гектар мәйданны биләп тора. 2019 елдан башлап Фируза Рәлиф кызы мәктәп ашханәсен үзенең хуҗалыгында үстергән сыйфатлы ит белән тәэмин итүче. Әлеге вакытта герефорд токымлы малларның баш санын арттыру өчен күп эшләр башкарыла. Агымдагы елда бу хуҗалыкта фидлот төзелде.Тырышып, булсын дип хуҗалык эшләрен алып бара Хәлиловлар. Шуңа күрә аларның хуҗалык күрсәткечләре басучылыкта да, терлекчелек тармагында да югары. Алар һәрвакыт алдынгылар рәтендә. Әле күптән түгел Уфаның Конгресс-Холлында узган авыл хуҗалыгы һәм эшкәртү сәнәгате хезмәткәрләре көненә багышланган тантаналы җыелышта күпьеллык намуслы хезмәте өчен Фируза Хәлилова Республика Башлыгы Радий Хәбиров кулыннан “Хезмәт батырлыгы өчен” медален кулына алу бәхетенә иреште.
