+30 °С
Облачно
Авыл хуҗалыгы
5 Октября 2023, 05:35
Мал карау ансат эш түгел
Авыл хуҗалыгында басу эшләре тәмамлану белән эш төгәлләнми. Ә киресенчә малчылык тармагында ныклы эш башлана. Алда кышлату чоры. Аны мал башын киметмичә чыгу өчен, әлбәттә, хуҗалык башлыклары һәм терлекчеләр җаваплы. Яңа Ялдәк авылындагы “Зарипов” крестьян-фермер хуҗалыгында үз эшенә җаваплы караучы Андрей Казанцев һәм Кирилл Чекуров эшли. Андрей терлекче генә түгел, ат караучы да, тракторчы да була. Ә Кирилл инде яшь кеше. Аны эшкә өйрәтүдә хуҗалык җитәкчесе Әхләф Зариповның өлеше зур.
Мал карау ансат эш түгел
– Егетебез Аллага шөкер әкренләп эшкә өйрәнде. Мин аны эшкә генә түгел, ә тормыш көтәргә дә өйрәтәм һәм тәрбия дә бирәм. Кирилл – бик тырыш егет. Аның үзенең максаты бар: машина алу. Шуңа күрә үсмер хезмәт хакын хыялын тормышка ашыру өчен туплый. Бергә эшләгән олы яшьтәге терлекчеләр дә аны хезмәт сөяргә өйрәтәләр. Бик тырыш, гадел эшчем минем, – ди фермер, егетне мактап.
Терлекчеләр Андрей белән Кирилл бер-берсе белән аңлашып эшлиләр. Әлеге вакытта алар симертүдәге малларны карыйлар. Иртәдән кичкә кадәр абзарда көннәре үтә аларның. Калган маллар җәйләүдә булу сәбәпле, алар өчен көтүче җаваплы. Дөресен генә әйткәндә, хуҗалыкта малчылык тармагында эшләр гөрләп тора.
