“Без үзебезнекләрне ташламыйбыз”

Нинди генә эшкә тотынсаң да, синең яныңда киңәшчең дә, фикердәшчең дә, синең эшеңне хуплаучың да, кирәк чакта ярдәм кулы сузарлык, җилкәсен куярлык дустың да булырга тиештер. Шул ук вакытта синең үзеңдә дә ният кылган эшеңне башкарып чыгарлык җегәрең, ышанычың зур булырга тиештер, шулай булмаганда, бер ялгызыңа зур эшкә җигелү бик авырга туры килә. Ялдәк авылында туып-үскән Рәмил Зариповта бу сыйфатларның барысы да бар. “Әтисеннән күргән ук юнган” дигән мәкаль дә нәкъ аның турында сыман, чөнки ул яшь кенә булуына карамастан, әтисе сукмагыннан китеп, фермер хуҗалыгын җитәкли. Бер яктан уңганлыгы, булдыклылыгы белән ил табынын баетса, икенче яклап ул мохтаҗларга ярдәм итү белән дә райондашларыбыз арасында билгеле. Илебездә коронавирус инфекциясе чыккач, халык үз-үзен изоляцияләргә мәҗбүр булган вакытта Рәмил бик нык борчыла. Олы яшьтәге кешеләргә, мохтаҗларга ничек ярдәм итәргә дигән уй белән янып йөри. Күп тә үтми, Борай район мөхтәсибәте каршында “Ярдәм” хәйрия проекты булдырыла. Бу хәйрия фондына ярдәм итүдә, әлбәттә, Рәмил башлап йөри. Өлкәннәр өчен генә түгел, ә балалар өчен дә зур чаралар оештырыла. Бу проект турында Рәмил Әхләф улы белән фикер алышканда ул болай диде: “Бу проект райондашларыбыздан алып райондашларга ярдәм итү дигән максаттан чыгып оештырылды. Районыбызда мохтаҗлар бик күп, янгын бәла-казасына тарыган, ялгыз яшәүчеләргә, төрле авыр чирләргә дучар булган балаларга, өлкән буын вәкилләренә ярдәм итү йөзеннән чыгып эшебез башкарыла. Бүгенге көндә “Ярдәм” хәйрия фонды Борай авылы, Гафури урамы, 39/1 йортта үзенең офисын булдырды. Анда һәркем килеп үзенең тәкъдимнәре белән уртаклаша ала. Дөнья мәшәкатьләрен, тормыш проблемаларын, кайгы-хәсрәтләрне, шатлык-сөенечләрне уртак итеп, ярдәмләшеп яшәргә тиешбез”.
Рәмил белән әңгәмәләшкәндә аның кешеләргә карата изгелеге ташып торуын аңладым. Ул шулай ярдәмчел булып туган. Өлешчә мобилизация башланып, райондашларыбызны Украинага хәрби махсус операциягә алып киткәч, районыбызда яшәүче өлкәннәр дә, эшче яшьләр, балалар да читтә калмады. Бүгенге көнгәчә халык бердәм ярдәмгә ашыга. Рәмил Әхләф улы да бу чарадан читтә калмый. Мобилизацияләнгәннәрнең гаиләләрен игътибар үзәгендә тота. Аларның гаиләләренә ашлыклата ярдәм күрсәтә. Шулай ук “Ярдәм” проекты нигезендә Украинада хәрби махсус операциядә катнашып һәлак булган райондашларыбыз гаиләләренә дә ярдәм кулы сузалар. Азык-төлек җыелмасы һәм итләтә ярдәм итә. Ә менә мобилизациягә киткән егетләр өчен эшкуарлар белән бергә җыелып киңәшләшеп автомунча булдыруда да Рәмил эшкуар Айдар Гарипов белән башлап йөрүче булган.
– Айдар белән бергә утырып, сөйләшеп, максатны һәм ниятне башка эшкуар, фермер егетләребезгә аңлаткач, алар бердәм булып кушылып, эшне оештырып җибәрдек. Менә әле тагын бер машина сатып алып, махсус хәрби операциягә җибәрүдә үз өлешебезне керттек. Илебез тыныч, табыныбыз мул булсын иде, – дигән теләктә сүзен тәмамлады фермер Рәмил.
Гөлн