Фермерлык эше җиңел түгел

Районыбызда фермер хуҗа-лыкларын җитәкләүчеләр арасында хатын-кыз затларының күп булуы матур күренеш. Карап торганда авыр фермер эшен тик ир затлары гына җитәкли алган кебек тоелса да, көчсез, нечкә холыклы ханымнар берничә дистә мал асрап, җир сөреп, фермер хуҗалыкларын җитәкли. Шулар сафына Борайда яшәүче Айсылу Исмәгыйль кызы Фәхретдинова да басты. Айсылу сөйләвенчә, фермер булу ул бик авыр һәм мәшәкатьле, тәүлегенә 24 сәгать игътибар таләп итүче эш. Борай егете Илнур белән гаилә корып яши башлагач та, яшь гаилә үз бәхетләрен малчылык тармагында табалар. Заманалар үзгәреп тора, эш урыннары кыскартыла, ә авыл хуҗалыгында беркайчан да эш бетми дип Фәхретдиновлар үгезләр асрый башлыйлар. – 1999 елда без шәхси хуҗалыгыбызда берничә баш үгез бозау сатып алып асрый башладык. Аннары инде савым сыерларын үрчетеп, сөт юнәлешен үстерүгә өстенлек бирергә уйладык. Малчылык тармагын үстерүдә ярыйсы гына тәҗрибә туплап, асылына төшенгәч, Дүсмәт авылындагы “Садертдинов” крестьян-фермер хуҗалыгын сатып алдык. Беренче карашта ташландык хәлдәге ферма мине бик борчуга салса да, тормыш иптәшем тырышлыгы белән мал абзарларын төзекләндереп, шәхси хуҗалыкта асраган эре мөгезле терлекләрне, сарык, кәҗә һәм куяннарны алып, бирегә күчтек. Фермер эшенә ярдәм итүгә юнәлдерелгән “Агростартап” кебек республика программасында катнашып, грант оттык. 30 баш симменталь токымлы башмаклар алып кайттык. Башмакларыбыз инде бозаулый башлады, декабрь ахырына бәлки сөт тә арта башлар. Бу кадәр эшне бер генә кеше башкарып чыга алмый. Шуңа гаиләбез белән эшлибез, улыбыз Илвир һәм кызыбыз Эльза да булыша, – дип сөйли Айсылу.Бүгенге көндә хуҗалыкта 45 баш мөгезле эре терлек, 80 баш сарык, 18 баш бозау, дистәдән артык кәҗә һәм куяннар асрала.

Хуҗалыкта продукцияне күп җитештерү өчен терлекләрне бик яхшы ашатырга кирәк. Күпьеллык һәм берьеллык үләннәр, арпа кирәк. Фәхретдиновлар 200 гектар мәйданда җир эшкәртәләр. Ике кешегә эш урыны булдырылган. Эшчеләр өчен бар уңайлыклары белән ферма янында гына кереп ял итү һәм чәй эчү өчен өй дә булдырганнар, хезмәт хакы да вакытында түләнеп бара. Уллары Илвир, армия сафыннан кайтканнан башлап, әти-әнисенең олы таянычы. Кызлары Эльза сарыклар һәм куяннар карауда көч сала. Электән техник базасы нык булган Фәхретдиновларның бар эшләре дә ырамлы бара. Мал азыгы да җитәрлек күләмдә әзерләнеп, ферма янына кайтарылып куелган.
– Иремнән башка фермерлык эшенә кереп китә алмас идем, хатын-кыз андый эшне үзе генә башлый алмый. Ул минем киңәшчем дә, олы терәгем һәм таянычым да. Кирәк икән терлекче, кирәк икән механизатор, вакытында водитель дә ул, – дип мактады гаилә башлыгын Айсылу.
Фәхретдиновларның киләчәктәге эш планнары симменталь токымлы сөт сыерлары баш санын арттыру белән генә чикләнмичә эремчек, каймак һәм сыр продукциясе җитештереп, реализацияләүне дә күзалдында тоталар. Фермада күпләп мал асрау өчен урын җитәрлек, абзарлар чиста һәм җылы.
Беркемгә дә сер түгел, фермерлык эше – җиңел хезмәт түгел. Монда авыл хуҗалыгын, терлекләрне генә ярату җитми, ә менеджмент белеме дә кирәк.
Ул эшен Айсылу белгеч киңәшләренә таянып башкара, килеп туган сорауларга интернеттан җаваплар эзли, уңышка ирешкән фермерлар тәҗрибәләрен өйрәнә. Эш башлаучы фермерга район авыл хуҗалыгы идарәлеге зоотехнигы Ленар Баһауов үз киңәшләрен биреп, савымнарны арттыру, сөт җитештерүдә чыгымнарны киметү, бозаулар сакланышын тәэмин итү өчен нәрсәләр эшләргә кирәклеге турында сөйләп тора.

Автор:Гульназ Хузина

Читайте нас:

© 1930-2024, Общественно- политическая газета Бураевского района, учреждена Агентством по печати и средствам массовой информации Республики Башкортостан и ГУП РБ Издательский Дом "Республика Башкортостан"

Телефон

8(34756)2-11-81

Электрон почта

[email protected]

Адресы

Республика Башкортостан, Бураевский район, с. Бураево, ул.Вострецова, д.37

Реклама хезмәте

8(34756)2-17-36

Редакция

8(34756)2-11-81

Хезмәттәшлек

8(34756)2-13-81

Кадрлар бүлеге

8(34756)2-17-36