Яз ярминкәсе үтте

“Язның беренче ярминкәсен башлап җибәрдек. Район халкына ит, сөт, май, яшелчәләр, бодай, арпа алып килдек. Халык бик сагынып каршы алды. Иртәдән ук чират торып, үзләренә кирәкле әйберләр алдылар",– диде район авыл хуҗалыгы идарәлеге начальнигы Ильвер Нурмөхәмәтов. Район мәдәният йорты үзешчәннәре ярминкәгә килүчеләрне    җыр-моңнары белән каршы алды. Бу көнне район үзәгенең сәүдә һәм ял итү мәйданында алма төшәрлек тә урын юк иде, дисәк хата булмас. Күпләп азык-төлек продуктлары, мал азыгы, сәнәгать товарлары белән сату итү– ярминкә кызу барды. “Урожай”, “Колос” хуҗалыклары һәм “Шакиров” крестьян-фермер хуҗалары да йөк машиналары арбаларын тутырып бодаен, малга фуражын, печәнен алып килгән. Ленин исемендәге, “Раянов”, “Габдуллин” һәм “Зарипов” крестьян-фермер хуҗалыклары сәүдә рәтләрен яшь үрчемнәр һәм курдюк токымлы сарыклар белән тулыландырдылар. Кош-кортлардан тавыклар да сатуга чыгарыла башлау яз килгәнен дәлилләде. Кыш акрынлап үз позицияләреннән чигенә башлады, яз аның үкчәсенә басып килә. Язгы хезмәт кәефе, тормыш-көнкүреш шартларының яхшыра баруы сәхнә түреннән туктаусыз агылган җыр-моңнарда да чагылды. Бу көнне безнең район “Үзебезнекеләрне ташламыйбыз” Бөтенрусия акциясенә кушылды. Шул уңайдан ярминкәдә катнашучылар “Русия, алга!” музыкаль флешмобы күрсәтте.

Яз ярминкәсе үтте