+24 °С
Яңгыр
Авыл хуҗалыгы
11 ноябрь 2021, 11:30
Алдынгыларның берсе булу җаваплылык та өсти
“Салават” – җитеш, алдынгы хуҗалыкларның берсе. Без әлеге тотрыклылыкка шул хәтле ияләндек ки, шуңа күрә аларның уңышлары, башкарган эшләре дә гадәти күренеш буларак кабул ителә. Алар үз «почмак»ларында тыныч кына эшлиләр, яшиләр. Биредә һәр өлкәдә тәртип, оешканлык сизелә. лар рәтендә йөргән хуҗалыкның Мулла авылында бүгенге көндә 1200 гектар мәйданда җир эшкәртеп, 280 баш мөгезле эре терлек асрап көн күрәләр. Хуҗалыкта сезон вакытында Каенлык, Мамады һәм Шабай авылларыннан килеп эшләүчеләр күп. Эшләү өчен яңа техника, яңа агрегатлар да җитәрлек. Мулла сөтчелек фермасында өч савучы эшли. Савып алынган табыш Балтачта “Акберов” сөт заводына тапшырыла. Кышлату чорына да зур әзерлек белән басалар. Печән һәм саламнар абзарлар янына китереп өелеп куелган. Елның коры килүе басучылык тармагын бераз аксатса да, салаватлылар булган уңышны югалтусыз җыеп алуга зур тырышлык салдылар. Алдагы ел уңышы өчен пар җирләре эшкәртеп, арыш та чәчеп куйганнар.
Алдынгыларның берсе булу җаваплылык та өсти
Зенфира Хафизова “Салават” хуҗалыгында 13 ел савучы булып эшли. Мулла авылында туып-үсеп, урта белем алып, шушында төпләнеп кала.
– Эшемне, сыерларымны яратам. Җитәкчебез, коллективыбыз яхшы, һәр кеше бер-берсенә ярдәм итәргә генә тора. Хезмәт хакын вакытында биреп баралар. Бүген сөт саву процессы нигездә механикалаштырылган булса да, сыер саву барыбер авыр хезмәт булып кала. Ул зур игътибар һәм көч сорый. Монда терлекләр белән аралаша белергә, сыерның һәрберсенә аерым мөнәсәбәттә булырга кирәк.
Һәр сыерның үз холкы бар. Аларга яратып исемнәр бирәм: Йолдыз, Кояшкай, Ромашка һәм башкалар. Яшь сыерларга “кызым” дип дәшәм. Алар мине тавыштан таный. Малкайлар үзләренә яхшы мөнәсәбәттә булганны аңлый, ярата. Сыер сауганда җырлыйм, нәрсә дә булса уйлап чыгарып, иҗат итәргә яратам, – ди ул.
Хатын-кызның бит әле өендә эше җитәрлек. Ашарга пешерү, өй җыештыру, мал карау, бакча эшләре дисеңме, гаилә учагын саклау. Зенфира ханым бу эшләрнең барысын да бар күңелен биреп башкара, һәркемне ачык йөз белән каршы ала.
Шулай итеп, эш яраткан кешегә авылда да менә дигән итеп яшәргә була. Бүгенге көндә Зенфира Хафизова эше белән куанып, киләчәккә матур планнар корып гомер итә.
