+24 °С
Яңгыр
Авыл хуҗалыгы
10 август 2021, 04:55
Туңга сөрү дәвам итә
Көзгә таба барабыз. Әлеге чорда яңа уңышны җыеп алу белән бергә киләсе ел икмәге турында кайгырту да кичектергесез бурычларның берсе булып тора. Сынаулы дисәк тә, авыл кешесенә мәрхәмәтле булды быел табигать, терлек азыгын да, икмәген дә бирде. Бүгенге көндә инде хуҗалыклар алдында тагын бер мөһим мәсьәлә – көзге чәчү һәм туңга сөрү эшләрен дә зур оешканлык белән алып бару мәсьәләсе өстәлде. Авыл хуҗалыгында шунысы игътибарга лаек: һәр хезмәтнең үз вакыты бар һәм нәтиҗәгә йөз тотып эшләгән хуҗалыкларда эш торышы да шушы алтын кагыйдәгә нигезләнеп башкарыла. Шулай булырга тиеш тә кебек, чөнки үз вакытында һәм җиренә җиткереп оештырылган хезмәттән генә уңышка өметләнеп була.
Туңга сөрү дәвам итә
Район кырларында агымдагы елгы урак өсте кампаниясе дә эзлекле рәвештә дәвам итә. Һава шартлары уңай, барысы игенче кулында. Тепляк авылындагы “Коробейников” крестьян-фермер хуҗалыгында да басу кыр эшләре гөрләп бара. Хуҗалык басуларында тракторлар гөрелтесе тынып тормый. Урып-җыелган җирләрне туңга сөреп, көзге чәчүгә әзерлек эшләре бара. Әлеге мөһим агрочараны тракторчылар өлгер темплар белән башкаралар. Илшат Шипаев һәм Фәнил Әхмәтхановлар хуҗалыкта инде берничә ел рәттән бу кампаниядә эшләп, үзләрен яхшы яктан күрсәтергә җитешкән. Алар көннәр аяз торганда басу мәшәкатьләрен озакка сузмый, җиренә җиткереп эшли.
– Бүгенге чәчү әйләнешендә бодай, арыш төп культуралар булачак. Чәчүне 15 августларда башларга уйлыйбыз. Хәзер безнең алда арпа, бодай культураларын җыеп алу бурычы тора. Сынатмабыз, – ди крестьян-фермер хуҗалыгы җитәкчесе Андрей Коробейников.
