Төзек юллар – үсеш күрсәткече

Ел саен октябрь аеның өченче якшәмбесендә юл хуҗалыгы хезмәткәрләре үзләренең һөнәри бәйрәмнәрен билгеләп үтәләр. Аларның эшчәнлегенең үзгәреш чоры нәкъ менә шушы көзге көннәргә туры килү символик мәгънәгә ия. Җәйге шартларда эшләү төгәлләнә һәм яңа этап – салкында, буранда эшләү старт ала.
– Юл төзү-ремонтлау эшлә-ренең сыйфатын күтәрү, заманча материаллар кулланып яңа технологияләр кертү көнүзәк бурыч санала. Һәрхәлдә, безнең учреждение бу бурычларны гамәлгә ашырырга сәләтле. Коллективта югары квалификацияле һөнәр осталары эшли, производство-техник база ныклы. Болар яңа технологияләргә юл ачып, җитештерү күләмнәрен үстерергә мөмкинлек бирә, – ди “Борай” муниципаль автоном учреждениесе җитәкчесе Зифил Сәетов. – Заказчылар хезмәтебездән канәгать. Эшне вакытында һәм сыйфатлы итеп үтәү өчен кирәкле төзелеш техникасы, автотранспорт бар. Максатларыбызның берсе – юлларны көзге-кышкы чорга җитди әзерләү, юлчыларга уңайлы һәм имин шартлар тудыру. Җәен Иске Балтач-Борай, Уфа-Борай-Яңавыл, Борай-Дүртөйле юлларының безнең карамакта булган өлешенең кырыйларын чабып, тәртиптә тотабыз. Борай авыл биләмәсенең авыллары юлларында чокырларны ремонтлау алып барабыз. Район буйлап грейдерлау үткәрәбез. Үткән елны Чалкак авылына керә торган дүрт чакрым араны ремонтлаган идек. Аны һәрвакыт тәртиптә тотабыз. Быел шул юл читендәге куакларны төпләдек. Урамнар, юллар себерелеп тора. Кышын юлларны эттерүгә бар көчебезне салабыз. Әлбәттә, эшебездәге яңалыклар болар белән генә чикләнми. Әлеге вакытта юл техникасын, көзге-кышкы чорда көйле эшләрлек итеп әзерлибез. Заказчылар белән турыдан-туры килешүләр нигезендә дә эшлибез.
“Борай” муниципаль автоном учреждениесенең юл төзү-ремонтлау бүлеге коллективы агымдагы елда юллар төзелеше һәм аларны ремонтлау буенча зур эш башкара. Аерым алганда, Борай авылында “Көнчыгыш” микрорайонында күп эшләр башкарылды. Бельская, Дружбы Народов, Вавилов, Жуков, Некрасов, Сосновая, Зеленая, Рябиновая, Трудовая, Радужная, Ольховая, Озерная урамнарында канаулар эшләнеп, юлларына тау чуерташы салынды. С. Габәши, Мичурин, Космонавтов һәм аларга якын урамнарны язын кар эрегәндә су басу сәбәпле, ике яклап зур канаулар ясалды. Бу бөтен исемлек түгел, юл төзү-ремонтлау хезмәткәрләренең эшенең очы-кырые юк.
Параллель төстә кышкы шартларда эшләүгә әзерлек темп ала. Бозлавыкка каршы чаралар запасы булдырыла, техника ремонтлана. Юл хезмәткәрләренең төп бурычы – юлларда бозлавык, кар көртләре кебек табигать факторларына үз вакытында җавап бирү, чөнки алар еш кына юллардагы фаҗигаләр сәбәбе булалар. Моның өчен һәрчак, теләсә кайсы минутта, төнлә дә, көндез дә тулы сугышчан әзерлектә булырга туры килә.
Шулай итеп, юл эшчеләре үзләре алдында торган бурычларны җиренә җиткереп башкару өчен көчләрен кызганмыйлар һәм һәр эшне сыйфатлы итеп башкарырга тырышалар. Юлларның яхшы хәлдә булуы – теләсә кайсы территориянең тормыш эшчәнлеген тәэмин итү, икътисадын һәм инфраструктурасын үстерү өчен иң мөһим шартларның берсе. Юлчыларның көче белән урамнарыбызның йөзе үзгәрә, район үзәген авыллар һәм башка районнар, шәһәрләр белән тоташтыручы юллар ремонтлана. Аларның хезмәте һәркемнең күз алдында. Юл хуҗалыгы хезмәткәрләре алларында зур бурычлар куелган һәм аларны үтәү өчен бар көчләрен, белемнәрен, тырышлыкларын бирәләр. Кышын-җәен, нинди генә табигать шартлары булуга карамастан, юлларның торышын кайгырталар.
Бу эшләргә коллективның һәр эшчесе үзеннән өлеш кертсә дә, юл эшчеләре арасында иң тырышып, үз бурычларын җиренә җиткереп башкарган хезмәткәрләрне билгеләп үтәсе килә. Мәсәлән, йөк машиналарында водительләр Фәдис Әхмәтдинов белән Альберт Габдуллин, грейдерда Энгель Насыйров белән Рәфил Таһиров, фронталь төягечтә Марсель Садыйков белән Вагис Халиков, экскаваторчы Ильвер Солтанов, тракторчы Вилдан Гәрәев, Әлфир белән Әүфәр Нигамәтҗановлар һәм башкалар хезмәт куялар.
“Борай” муниципаль автоном учреждениесенең юл төзү-ремонтлау бүлеге җитәкчесе Зифил Сәетов та үз хезмәткәрләрен мактап кына телгә ала.
– Хезмәттәшләрем һәм шәхсән үзем өчен Юл хуҗалыгы хезмәткәре көне – ул эшләнгән эшебезгә нәтиҗә ясау һәм киләчәккә планнар билгеләү өчен тагын бер сәбәп. Ветераннарыбызны һәм бүгенге көндә эшләп килүче барлык хезмәткәрләрне һөнәри бәйрәмебез белән тәбриклим! Җирлегебезнең юл челтәре үсешенә һәм халыкның тормыш шартларын яхшыртуга керткән хезмәтегез өчен чын күңелдән рәхмәтемне белдерәм. Барчагызга ныклы сәламәтлек, гаилә бәхете, эшегездә яңадан-яңа уңышлар телим, – дип котлау сүзләрен җиткерә Зифил Әлфәт улы.