Гәзит тарихы да кеше язмышыдай

Хәзер матбугат чараларына электрон массакүләм чаралар да өстәлде һәм алар барысы бергә республика, ил, дөнья күләмендә булган иң мөһим вакыйгалар белән даими танышып барырга мөмкинлек бирәләр. Билгеле, укучы үзе өчен иң кызыклы һәм эчтәлекле дип санаган басманы сайлап ала.
Күпләр өчен район гәзите нәкъ шундый басмалардан санала. Ни генә дисәләр дә, ул район кешеләренең тормышындагы һәр вакыйга белән якыннан таныштырып бара. Халыкның фикерләре, дөньяга карашы, уңышлары, борчулары – болар барысы да гәзит битләрендә чагылыш таба, киң җәмәгатьчелекнең игътибарын проблемаларны хәл итүгә тарта.
Бу катлаулы юлда журналист һөнәренең югары стандартлары, үз укучыларына ихтирамлы мөнәсәбәт, хакимият белән җәмгыять арасында рухи күпер булуны аңлап эш итү төп юнәлеш булып кала.
Беләсез инде, хәзерге вакытта гәзитләргә тираж җыю авыр бирелә. Почта белән хәл авыр. Бүгенге көндә тираж – 2 меңгә якын экземпляр.
Без шулай ук сайтны алып барабыз, социаль челтәрләрдә сәхифәләребез бар. Гәзитне күбрәк уйларга яраткан, серенә, сәбәбенә төшенергә теләгән кешеләр укый.
Басма матбугатны таратуга килгәндә, без электән почтальоннар белән дус булдык, һәр язылу кампаниясеннән соң аларны бүләкләп торабыз. Без алар турында “Алга”да язабыз, бер коллектив кебек эшлибез.
Матбугат көне – республикабызда гәзит-журналлар нәшер итүдә эшләүче төрле профессия кешеләренең – журналистларның, полиграфия хезмәткәрләренең, шулай ук вакытлы матбугатны таратуда хезмәт куючыларның уртак бәйрәме ул. Бу көнне без тугрылыклы әбүнәчеләребез белән дә уртак бәйрәмебез дип саныйбыз. Гәзитебезгә язылуыгыз, аны көтеп алып, кызыксынып һәм яратып укуыгыз, безгә хат-хәбәрләр юллап торуыгыз өчен рәхмәт сезгә. Бу бердәмлек бик озак еллар дәвам итсен иде.