+24 °С
Яңгыр
Җәмгыять
14 ноябрь 2025, 05:18
«Алга»ның 95 герое. 52. Камил Садретдинов
“Алга”ның 1964 елгы саннарын караганда “Егет булса, шундый булсын” исеме астында чыккан мәкаләгә тап булдым. Анда Чалкак авылы клуб мөдире Камил Садретдинов турында язылган. Язманы укып, бу кешенең бар яклап та гәзитнең герое булырлык икәнен аңладым.
Сез дә укып карагыз әле:
“Бу тыйнак егет – Чалкак авылындагы клуб мөдире Камил Садретдинов. Аның егет буларак та, мөдир буларак та килмәгән җире юк. Сыздырып баянда уйный, өздереп бии, күңелләрне җилкендерерлек итеп җырлый белә ул. Ә кешеләргә мөнәсәбәте, ягымлы итеп, йомшак кына сөйләшүләре – җаныңны эретерлек.
Ул сәләтле оештыручы да. Шуңа күрә клубта эш гөрләп тора. Монда нинди булса да культура-масса чарасы үткәрелми калган көн булмый. Я концерт, я доклад яки лекция, я тематик кичә була.
Клубның үзешчән сәнгать коллективы күрше авылларга чыгып та халыкка культура хезмәте күрсәтә.
– Безнең Камил! – авылдашлары аны үз итеп шулай дип кенә йөртәләр.
– Авылның яме ул, – диләр яшьләр аның турында һәм ул оештырган эшләрдә катнашырга атлыгып торалар.”
Камил Садретдинов турында белүчеләр, аның туганнары, балалары, оныклары булса, редакциягә элемтәгә чыгарлар дип өметләнәбез.
