Иңгә-иң куеп

Сабыр холыклы, түзем, эшен намус белән башкаручы бу кешеләр эш дәверендә беркайчан да зарланмады, “шулай эшлим, болай эшлим”, дип күкрәк киереп тә йөрмәде. Тормыш иптәшләре Анфиса белән Роза апа да МСОда эшләп, шушы оешмадан лаеклы ялга китте. Роза Фәйзи кызының оешмада 37 ел, Анфиса Гафият кызының 32 ел хезмәт стажы бар. Алар икесе дә тимер-бетон заводында озак еллар кранчы булып эшләде һәм үзләрен намуслы, тырыш хезмәт кешесе итеп күрсәтте.

Имеш Ходай гаиләләрне “Бер уңганга – бер ялкау, бер уңганга – бер ялкау” дип парлый икән, “Бер уңганга – бер уңган” дип ялгышып киткән чаклары да була ди. Бу ике гаилә, мөгаен, нәкъ менә шул чакта барлыкка килгәндер дә. Ике гаилә дә бик матур итеп йорт салып кергән. Йорт капкасын ачып керү белән “әллә оҗмахка килеп кердем инде” дип уйлыйсың. Бөтен җирдә чисталык, пөхтәлек, бакча тутырып җиләк-җимеш агачлары, яшелчәләр утыртылган, йорт алды берсеннән-берсе матур чәчәкләр белән тулган. Ихатада бар да уйлап эшләнелгән. Ял итү урыннары булдырылган. Өй эчендә яшәр өчен бөтен уңайлыклар тудырылган. Тормыш матурлыгы гүзәл затлы хатын-кызлар кулында диләр. Бу бик дөрес сүзләр. Тәрәзә төпләрендә үскән берсеннән-берсе матур гөлләр, хуҗабикәләрнең күңел җылысын биреп эшләгән кул эшләре өй эчләренә матурлык, җылылык тудырган. Бу ике гаилә дә дөньяга карашлары, матурлыкны күреп сөенә белеп яшәүләре белән дә бер-берсенә охшаш. Роза апа белән Анфиса апа олы яшьтә булуларына карамастан, әле дә дөньяга яшьләр күзе белән карап яшиләр. Аларның яшь, матур булып яшәү сере, мөгаен, күңел җылысын биреп яратып эшләгән шөгыльләре булудадыр. Гомер буе авыр эштә эшләгән бу кешеләргә күпме күңел матурлыгы салынган! Шушы матурлык кул эшләренә күчкән. Тегү, чигү, бәйләү, үрү – аларның яраткан шөгыльләре.
Карап торуга безнең өчен гади генә күренгән әйбер, мәсәлән, агач ботагы, Анфиса апаның күңел күзе аша җанланып нәрсәгә булса да әверелә. Бу сәләт аңа Ходай тарафыннан бирелгән. Анфиса апаның остаханәсенә барып керү белән ул тудырган эшләрне күреп хәйран каласың. Самавырлар, курчаклар, светильниклар, хайваннар, кошлар, безнең якта үскән гөмбәләр, күз явын алырлык гөлчәчәкләр, җиләк-җимешләр – нәрсә генә юк монда, аларны санап бетерерлек түгел. Өй эчендәге стеналарда сәйлән, алмаз мозаикасы белән эшләнгән зур-зур картиналар. Аларны эшләү өчен күпме вакыт, түземлек кирәк. “Мин кул эшләремне авырсынмый, киресенчә, ләззәт табып эшлим, иҗат иткән һәрбер эшем миңа илһам бирә, – ди Анфиса апа. – Шушы эшләрем арасында иң кадерлесе – “Анфиса” дигән курчагым. Оныгым белән 2нче санлы балалар бакчасы исеменнән республикада үткәрелгән “Дәү әниемнең алтын куллары” конкурсында катнашып III дәрәҗә Диплом белән бүләкләндек”.
Халык соравы буенча осталык дәресләре күрсәтеп осталык сере белән уртаклашкан, төрле күргәзмәләрдә, конкурсларда катнашып җиңгән өчен аңа бик күп Рәхмәт хатлары тапшырылган.
2016нчы елда Борайда БСТ каналының 15 еллыгын үткәргәндә каналның “Сәләм” программасы алып барган очрашуда Анфиса апаның да бәйләп эшләгән чәчәкләрен Борай, Мишкә, Калтасы халкы сокланып, зур кызыксыну белән карады. Шушы ук елны аның район китапханәсендә “Хатын-кызлар тудырган матурлык” дигән күргәзмәсе оештырылды. 2021 нче елда Борайда төбәк Башлыгы тормыш иптәше Каринэ Хәбированың “Хатын-кызлар бәхете территориясе” ачык академиясендә Анфиса апа да үзенең эшләре белән катнашты.
Яхыя абый белән Роза апа 57 ел, Нәкыйб абый белән Анфиса апа 55 ел бер-берсенә олы терәк булып тормыш юлыннан бергә атлыйлар. Матур парлар булып озак еллар яшәгәнсез, сере нидә? – дигән сорауга ике гаилә дә: “Бер-береңне аңлап, хөрмәт итеп яшәп, бер-береңә юл куя белүдә”, – дип җавап бирде. Шушы кадәр еллар бергә матур итеп яшәр өчен, күпме түземлек, сабырлык кирәк. “Шушы еллар эчендә дөньябызны бөтәйттек, балалар үстердек, Аллага шөкер, оныклар, оныкчыклар сөю бәхетенә ирештек”, – дип искә ала алар бүген, шатланып. Хәсәновларның “дәү әни, дәү әти” дип өзелеп торган 10 оныгы, 3 оныкчыгы, Раяновларның 10 оныгы, 2 оныкчыгы бар – бу бит үзе иң зур бәхетләрнең берсе!
Бүгенге көндә ике гаилә дә аларга хөрмәт белән караган кияүләре, киленнәре булуы белән дә бик бәхетле. “Оясында ни күрсә, очканында шул булыр”, – диләр. Аларның балалары да әти-әниләре кебек уңган, тырыш булып, күпләрне сокландырып матур итеп дөнья көтә.
Хезмәт ветераннары Яхыя абый белән Нәкыйб абый икесе дә сугыш чоры балалары. Бу чор балалары бик яшьли үлемнең нәрсә икәнен аңлады, теше-тырнагы белән ябышып яшәргә тырышты, тик тырыш, чырыш, түзем булсаң гына авырлыкларны җиңеп буласын аңлады. Бүген алар бик бәхетле. Чөнки яннарында иңгә-иң куеп тормыш сынауларын бергә үткән олы йөрәкле тормыш иптәшләре бар.

Рәфит Хәмәтшин.

Редакциядән: Төзүчеләр көне уңаеннан МСОда эшләгән кешеләр турында дүрт мәкалә китерделәр. Әлбәттә, гәзитнең бер санында аларны бастырып булмый, калган өч мәкалә гәзитебезнең алдагы саннарында басылачак.