Мөһим мәсьәләләр каралды

«Управдом» муниципаль форумы – халык белән хакимият органнары, район хакимияте, торак-коммуналь комплекста катнашучылар вәкилләре белән турыдан-туры ачык әңгәмәнең нәтиҗәле ысулларының берсе, ул торак өлкәсендәге кискен мәсьәләләргә аерым игътибар җәлеп итәргә тиеш.

Анда район хакимияте вәкилләре, ресурслар белән тәэмин итү һәм хезмәт күрсәтү оешмалары җитәкчеләре, күпфатирлы йортларда яшәүчеләр белән конструктив диалог үткәрде.

Очрашу барышында катнашучылар торак-коммуналь хуҗалык өлкәсенә кагылышлы актуаль мәсьәләләр буенча фикер алыштылар: капиталь ремонт, йортларның агымдагы торышы һәм торак шартларын яхшырту, күпфатирлы йортларда хезмәт күрсәтүче оешмаларның эше, төтен һәм вентиляция каналларын карап тоту, торак-коммуналь хезмәтләр өчен түләү тәртибе һәм башкалар.

Район хакимияте башлыгының төзелеш һәм торак-коммуналь хуҗалыгы буенча урынбасары Линар Вәлиев форумда катнашучыларга районда үткән елда башкарылган, аннары планлаштырылган чаралар белән таныштырып үтте һәм шулай ук капиталь ремонтка кертемнәрне арттыру турында да аңлатты.

– Капиталь ремонт – агымдагы эшләр генә түгел, ә масштаблы проектлар: түбәләрне алыштыру яки ремонтлау, подъездларны төзекләндерү, су, җылылык һәм электр белән тәэмин итү системаларын яңарту. Әмма акча җитмәү сәбәпле, күп кенә йортлар тиешле ремонтны вакытында ала алмыйлар. Проблемалар җыела, ә аларны хәл итү билгесез вакытка кичектерелә. Нәтиҗәдә, яшәүчеләр булдырмый кала алырлык авария хәлләре белән очраша.

2022 елдан башлап Башкортстан Республикасында күп фатирлы йортларны капиталь ремонтлауга кертемнең минималь күләме үзгәрешсез кала. Бу вакыт эчендә материалларга һәм хезмәтләргә бәяләр артты, ә тарифлар – юк. Бүген безнең төбәк Русия субъектлары арасында капиталь ремонтка иң түбән взнослар җыючылар исәбенә керә. Һәм бу инде йортларның торышына йогынты ясый башлый.

Шулай итеп капиталь ремонт – ул чыгымнар гына түгел, бу киләчәккә инвестицияләр. Проблемаларны хәл итүне озаграк кичектергән саен, аларны бетерү кыйммәтрәк булачак. Минималь кертем күләмен арттыру капиталь ремонт фондын арттырырга һәм күбрәк йортларны ремонтларга мөмкинлек бирәчәк.

Бүгенге көндә районда түбәсе алыштырылмаган күпфатирлы йортлар күп, шулай ук ремонт таләп итә торган подъездлар да бар. Әмма өстенлектә хәзерге вакытта, әлбәттә, су үткәрә торган түбәләр. Дәүләт капиталь ремонт программасын хуплый, әмма халыкның үз катнашыннан башка проблеманы хәл итеп булмый. Взносларны арттыру мәсьәләсе – квитанциядәге саннар гына түгел, ә безнең йортларның киләчәк буыннар өчен нык һәм уңайлы булып калуы турында кайгырту да ул. Әлеге вакытта минималь взнос аена 7,46 сум тәшкил итә, алга таба ул бер кешегә 12 сум тирәсе булачак, – диде Линар Вәлиев.

Чарада күпфатирлы йортларда актив яшәүчеләр тарафыннан кискен мәсьәләләр күтәрелде, ә профильле оешмалар вәкилләре халыкта туган мәсьәләләр буенча аңлатмалар бирделәр һәм халык күтәргән барлык сораулар контрольгә алынды.

Форумда район хакимияте башлыгы Рушан Гәрәев катнашты һәм сөйләшүгә йомгак ясады:

– Борай районы халкы белән тыгыз тандемда гына җирле үзидарә органнары, кызыксынган ведомстволар белән бергәләп, авылдашларыбызның тормышын уңайлырак һәм сыйфатлырак итә алачагына ышанам.