Аетның бөркете ул

Марсель армиягә киткәнче БДУның физика факультетында дүрт ел укып, бакалавр дәрәҗәсен кызыл дипломга яклый. Аннан соң ике ел магистратурада белем ала. Шул ук вакытта Урайда инженер-техник булып та эшли. Акыллы, эшсөючән егет армия сафына шушы этапларны үтеп, тормыш тәҗрибәсе туплап китә.
Ает авылында Глүсә белән Венарик Нуриәхмәтовлар гаиләсендә икенче бала булып дөньяга аваз салган малай туган авылында башлангыч мәктәпне тәмамлап, урта белемне Таңатар мәктәбендә ала. Балачагыннан ук әти-әнисенең кул арасына кереп, бөтен эшкә өйрәнеп үсә. Мәктәптә дә гел яхшы билгеләргә генә өлгәшә ул. Буш вакыталарын заяга уздырырга яратмый, китап укып, тәмле ризыклар пешерергә, салатлар әзерләргә яратып үсә. Апайларына да зур ярдәмче була. Туганнарына белем иленең серләрен ачучы да ул була.
– Армиядә хезмәт итү һәр егетнең бурычы. Ир-атлар авырлыклар алдында каушап калмаска, аларны җиңә белергә тиеш. Армия безнең өчен тормыш мәктәбе. Биредә ныгып кына калмыйсың, яңа дуслар да табасың, моңарчы ишетеп кенә белгән күп шәһәрләрне күрәсең. Әле хәрби хезмәткә алынырга өлгермәгән дус-ишләребезне дә кызыктыра алабыз. Җәйгә алар да армиягә барырга уйлый,–ди Марсель телефон аша сөйләшкәндә.
Хәрби бурычларын кайда гына үтәсәләр дә, моңарчы Борай егетләре районыбызның, республикабызның йөзенә кызыллык китермәде, моннан соң да шулай булса иде.