+30 °С
Болытлы
Җәмгыять
25 гыйнвар 2022, 10:50
Түбәләрне кардан тазартырга кирәк
Һава температурасы үзгәреп торганда кар яву түбәдән кар төшү куркынычын көчәйтә. Моның нәтиҗәсе буларак, түбәләрдән кар ишелү белән бәйле бәхетсезлек очраклары килеп чыгу куркынычы арта. Бу хәлләрне исәпкә алып, 25 гыйнвар көнне, район хакимияте тарафыннан төзелгән комиссия әгъзалары рейдка чыкты. Рейд вакытында предприятие, оешма һәм учреждение җитәкчеләренә ведомство карамагындагы биналарның түбәләрен кардан, боздан һәм боз сөңгеләреннән чистарту эшләрен үз вакытында оештырырга кирәклеге әйтелде. Шулай ук, хәвефсезлек чараларын үтәп, керү юлларын һәм территорияләрне кардан һәм боздан арындырырга кирәклегенә дә басым ясалды.
Түбәләрне кардан тазартырга кирәк
–Түбәдән кар төшүнең корбаны булмас өчен биналар һәм корылмалар яныннан үтеп барганда сак булыгыз, бигрәк тә кар явып үткәннән соң! Мондый участокларны, корылмалар стеналарына якын килмичә, мөмкин кадәр тизрәк үтәргә тырышыгыз. Кар һәм боз төшү яки түбәне чистарту буенча эшләр башкару турында кисәтүче сигнал тасмаларына, коймаларга игътибарсыз калмагыз. Куркыныч зона эченә узарга омтылмагыз. Балаларга йорт диварлары, сәүдә объектлары янында йөрү күңелсез нәтиҗәләргә китерергә мөмкин булуын аңлатыгыз. Әгәр сез куркыныч зонада балалар уйнавын күрәсез икән, аларны потенциаль куркыныч турында кисәтегез һәм күңел ачу өчен башка мәйданчык табарга кирәклеген әйтегез,–дигән киңәшләрен җиткерә рейд әгъзалары.
