Яшь бөркетләр канат ныгыта

Әлеге чара «Гүзәл» үсеш һәм тәрбия үзәге»ндә автоном коммерциягә карамаган оешмасының туган башкорт телен, халыкның гореф-гадәтләрен һәм мәдәниятен саклау буенча «Гаилә учагы» иҗтимагый-әһәмиятле программасы буенча үткәрелде, ул муниципаль районның социаль юнәлешле коммерциягә карамаган оешмаларына муниципаль район бюджетыннан субсидияләр бирү конкурсында җиңүче булды.

Чараның максаты – мәктәпкәчә яшьтәге балаларда сәламәт яшәү рәвешенең тотрыклы күнекмәләрен формалаштыру, балаларны башкорт халкының гореф-гадәтләре һәм йолалары белән таныштыруны дәвам итү, башкорт телен өйрәнү белән кызыксындыру, балаларның инициативасына һәм мөстәкыйльлегенә ярдәм итү, тәрбияләнүчеләрнең иҗади сәләтләрен, аларның фикерләвен, коммуникатив күнекмәләрен үстерү, мәдәни кыйммәтләр формалаштыру.

Чакырылган кунаклар Борай районының Социаль юнәлешле коммерциягә карамаган оешма буенча кураторы Әлфидә Дүсмәтова, «Гүзәл» үсеш һәм тәрбия үзәге» автоном коммерциягә карамаган оешмасының директоры Ләйсән Нәбиуллина, район мәгариф бүлеге методистлары Рәмилә Солтанова, Эльвира  Данилова һәм Ралия Рәхимҗанова булдылар.

Район үзәгенең дүрт балалар бакчасыннан алтышар малайдан торган командалар  “Яшь бөркетләр канат ныгыта” бәйгесендә үз көчләрен сынап карадылар.  Иң элек һәр команда үзе белән таныштырып үтте. Аннары иң кызыгы башланды. Тәрбияләнүчеләр өчен сигез төр сынау әзерләнгән иде. «Нигез салучылар» төрендә Борай районында булган истәлекле урыннарны табырга, «Конструктор» бәйгесендә Башкортстан республикасының районнарын дөрес итеп картага куярга кирәк иде. «Балык тоту» малайларга аерым да ошады. Һәр бала кармагына күбрәк балык тоту өчен бар көчен салды. «Ат чабышлары»нда җитез малайлар бер-берсен уздырмаска тырыштылар. Капчык киеп тә йөгерделәр, уктан да аттылар катнашучылар. Бәйге канат тарту белән тәмамланды. Чара бик күңелле үтте. Малайлар спорт белән чын дус икәнлеген күрсәттеләр. Әлбәттә, ярышлар булгач, җиңүчесе дә, җиңелүчесе дә булды. «Кояшкай» өченче балалар бакчасына призерлыкка чыгу өчен аз гына баллар җитмәде. Алар – дүртенче урындалар. Өченче урынны «Йәйгор» балалар бакчасы малайлары алды. Икенче урынга бишенче балалар бакчасы тәрбияләнүчеләре чыкты. Беренчелек – хуҗаларда, «Гүзәл» балалар бакчасында. Һәр команда грамота белән бүләкләнде, малайларга истәлекле бүләкләр тапшырылды.

«Яшь бөркетләр канат ныгыта» бәйгесе – күңел ачу чарасы гына түгел, милли йөзебезне, телебезне саклап калу, йөзек кашыбыз булган гореф-гадәтләрне, йолаларны кире кайтару, балаларыбызны иманлы итеп тәрбияләү дә.