Яңа автобуслы булдылар

Алучылар арасында – Борай авылының беренче санлы мәктәбенә яңа автобус кайтты. Транспорт чараларыннан ачкычларны республика Башлыгы Радий Фәрит улы Хәбиров шәхсән үзе тапшырды.
“Бүген без рекордлы санда мәктәп автобуслары һәм җиңел автомобильләр тапшырдык – 200дән артык берәмлек. Бу үзебезнең федераль һәм республика бюджетлары хисабына сатып алынган техника. Без мәктәп автопаркын яңарту буенча системалы эшне дәвам итәбез. 2019 елдан Башкортстан мәктәпләренә 900гә якын яңа автобус кайтты”, – дип билгеләп үтте Радий Хәбиров үзенең социаль челтәрләрендә.
Төбәк Башлыгы ассызыклаганча, мәктәп укучыларының уңайлылыгы һәм хәвефсезлеге – хакимият өчен өстенлек, ә заманча автобуслар хәтта ерак авылларда да балаларны сыйфатлы йөртүне тәэмин итәргә мөмкинлек бирә.
Борай авылының беренче санлы мәктәп директоры Азат Арсланов белем бирү учреждениесе өчен яңа автобус уку елы башлануга чын бүләк булды, дип сөйләде:
“Безнең өчен бу күптән көтелгән вакыйга. Яңа автобус 31 урынга исәпләнгән, һәм сентябрьдә без яңа машина йөртүчене рәсмиләштерәбез, шуннан соң ул шунда ук линиягә чыгачак. Бу балаларны мәктәпкә алып бару гына түгел, ә аларны район чараларында, олимпиадаларда, ярышларда катнаштыру өчен дә бик яхшы мөмкинлек. Хыялыбызның тормышка ашуына без бик шат”.
Аның сүзләренчә, яңа транспорт – мәктәп маршрутлары гына түгел, белем бирү мөмкинлекләрен киңәйтү дә ул.
Яңа ПАЗ автобусы Дәүләтҗан Сахаевка эләкте. Руль артындагы стажы – 48 ел. Бу сан аның бәһасез тәҗрибәсе һәм яраткан эшенә тирән бирелгәнлеге турында сөйли.
Биш ел инде Дәүләтҗан Фәтхелбаян улы – мәктәп автобусы йөртүчесе. Аның көне – расписание буенча даими хәрәкәт: иртән балаларны авыллардан мәктәпкә алып килә, аннары өйләренә тарата, район, республика буенча ярышларга йөртә. Буш вакыт калмый диярлек, әмма ул үз бурычының мөһимлеген яхшы аңлый. Озата баручы укытучы белән бергә ул үз автобусы салонында тулы хәвефсезлек атмосферасы тудыра. Хәзер ул балаларны яңа ПАЗ автобусында йөртәчәк. Укучылар өчен бу – яңа уку елына яхшы бүләк.