Борай районы укытучылары географлар слетында катнаштылар

Ике көнгә безнең педагоглар хәрби техника экспозициясен, «Геройлар аллеясын» һәм «Партизаннар авылын» карап, мавыктыргыч экскурсия программасына чумдылар. Алар шулай ук белем бирү программаларында, осталык дәресләрендә һәм тренингларда катнаштылар, бу тәҗрибә уртаклашырга һәм яңа белемнәр алырга мөмкинлек бирде.

Беренче көнне алар алдында БР Мәгариф министры Илдар Мәүлетбирдин, урыс география җәмгыятенең Башкортстан төбәк бүлегенең рәисе, М.Акмулла исемендәге Башкорт дәүләт педагогия университетының ректоры Салават Сәгыйтов чыгыш ясады.

Мәгариф министры Илдар Мәүлетбирдин географларның беренче республика слетын уздыру идеясе төбәк Башлыгы Радий Хәбировта туганын, ул мәгариф системасына зур игътибар биргәнен сөйләде. Илдар Марат улы слетны оештыручыларга рәхмәт белдерде һәм аларга нәтиҗәле эш теләде.

Йомгаклау көне аеруча әһәмиятле була – география укытучылары республика Башлыгы Радий Хәбиров белән очрашалар.  Анда мәгарифкә һәм географик юнәлешне үстерүгә кагылышлы мөһим мәсьәләләр турында фикер алышалар.

– География укытучыларының мондый масштаблы слетында мин беренче тапкыр катнаштым, мондый чаралар педагогларга хезмәттәшләре белән очрашырга, аралашырга, тәҗрибә уртаклашырга, укудагы яңалыклар белән бүлешергә һәм, әлбәттә, үз районын тәкъдим итәргә мөмкинлек бирә, – ди беренче мәктәпнең география укытучысы Илшат Нәркис улы.

География укытучыларының республика слеты онытылмас тәэсирләр калдыра һәм барлык катнашучыларны фәнне укытуда яңа казанышларга рухландыра.