Чын укытучы ул

Хәзерге шартларда мәктәптә балага аң һәм тәрбия бирер өчен нинди укытучы булырга кирәк соң? Үзенең предметын югары дәрәҗәдә белгән, балаларның яшь үзенчәлекләрен, психологиясен яхшы аңлаган, үз һөнәренең остасы булган, балаларны мөстәкыйль фикер йөртергә өйрәтә, аларны һәрьяклап ача белә торган укытучылар кирәк.

 Руфина Касыйм кызы менә шундый укытучылар рәтендә, югары категорияле укытучы. “Аның өчен үзеңә таләпчән булырга, эзләнергә, яңалыкларны өйрәнеп, аларны эш барышында куллана белергә, үзеңне башкалар белән чагыштырып, читтән торып бәя бирә белергә кирәк”,- ди якташыбыз. Чын укытучы үз эшенең нәтиҗәсе яхшы булсын өчен бөтен күңелен биреп эшли, балаларның язмышы өчен борчыла. Кирәк икән, ул артист, рәссам, шагыйрь дә була. Һәр баланың кечкенә генә булса да сәләтен күрергә, аны үстерергә, балада үз-үзенә карата ышаныч тудыра белергә тиеш. Һәр балага шәхес буларак формалашырга, тормышта авырлыклар алдында каушап калмаска, аны үз гамәлләренә һәм хезмәтенә дөрес бәя бирә алырдай итеп тәрбияләргә бурычлы бүгенге укытучы. Бүгенге укытучы заманнан бер адым да калышмыйча атларга тиеш. Чөнки ул – балалар аласы бик күп белемнәрнең нигезен салучы кеше.

“Укучылыларымның казанышлары минем өчен зур шатлык. Былтыргы уку елында ике укучым республика күләмендә математика фәненнән олимпиадада җиңделәр, 21 тапкыр укучыларым фәнни-практик конференцияләрдә катнашып, барсы да призлы урыннар яуладылар. Татарстанда башкорт телен дә үстерәбез, онытмыйбыз.  Башкортча инша язып, укучыларым республикада 2 ел рәттән 1нче урын алып киләләр. Президент Кремленә зур бүләкләүгә чакыралар, мәгариф министры кулыннан грамоталар алдык”, - ди ул үзе.

Руфина Касыйм кызы заман белән бергә атлый. Үз эшендә яңа алымнар, яңа технологияләр кулланып, укучыларга төпле белем биреп, бөтенрусия һәм ил күләмендә үткәрелә торган һөнәри бәйгеләрдә катнашып, даими рәвештә үз белемен арттыру өстендә эшли. Коллегалары өчен  “Кече яшьтәге мәктәп укучыларының функциональ грамоталылыгын формалаштыру һәм үстерү” дип аталган методик әсбап бастырып чыгарган. 

Хәзерге вакытта укытучыга үзенең тәҗрибәсен, үз эшенең нәтиҗәсен күрсәтер өчен күп мөмкинлекләр тудырылган: төрледән-төрле конкурслар, конференцияләр үткәрелә, зур уңышларга ирешүчеләргә грантлар бирелә. Бары тик эшеңә җаныңны биреп, укучыларың белән уртак тел табып эшлисе генә кала. Якташыбызга уңышлар телик!

Автор: Индира  Нигаматҗанова