Зур өметләр баглаучы студент

Район хакимиятенең тәкъдиме буенча бүгенге язмабызның герое  – Борай авылының өченче санлы урта мәктәбен тәмамлаган акыллы, максатчан һәм сәләтле егет Марат Шафыйков. Ул – Башкорт дәүләт медицина университетынын бишенче курс студенты. 
Марат Шафыйков Борай авылында туса да, балачагы һәм үсмер еллары дәү әтисе белән дәү әнисе янында Силасау авылында үтә. 
Мәктәптә уку дәверендә үк алдынгы укучылар исәбендә була Марат. Елның-елында барлык олимпиадаларда катнашып, беренче урыннарны ала ул. Уку белән беррәттән спортны да үз итә Марат, районда гына түгел, республика күләмендә үткән ярышларда да сынатмый. 
Кышын чаңгыда йөрсә, җәен чаңгы роллерларыннан төшми. Борай-Силасау юлында аны еш кына күрергә була иде. Хәтта ял көннәрендә, каникулларда Силасаудан килеп, мәктәптән яки спорт базасыннан чаңгылар алып, йөрергә килә. Аннары юлга чыгып, юлдаш машиналарга утырып кайтырга чыга. 
Хәзерге үсмерләргә телефон-компьютердан башка берни кирәкми, ә Марат укуда да, спортта да, дәү әни-дәү әтигә ярдәмләшергә дә өлгерә. Бар яклап та булдыра өлгер егет. Төп дәүләт имтиханнарын да югары балларга тапшырып (химиядән – 98 балл), кызыл аттестат  һәм алтын медальгә  мәктәпне тәмамлый ул.
 Кая укырга бару дигән сорау күптән Маратны борчыса да, тиз чишелеш таба алмый. Хәрби булырга да омтыла, укытучы да, инженер да кызыклы кебек... Тик нигәдер киләчәктә ул үзен ак халатлы итеп күрә, шуңа медицина буенча укырга керә. Мәскәү, Санкт-Петербург, Казан һәм Уфа шәһәрләрендәге медицина уку йортларын сайлаганда, ул Уфага өстенлек бирә, әнисе, дәү әнисе янына кайтып йөрергә уңайлырак булачак бит. Яшь һәм зур өметләр баглаучы студент, хәзерге вакытта Башкорт дәүләт медицина университетында дәвалау факультетында  укый. Ул тырышлык һәм омтылучанлыкның укуда югары нәтиҗәләргә ирешүдә ничек ярдәм итә алуының ачык мисалы булып тора.
Югары уку йортындагы укуның беренче көннәреннән үк Марат медицина белән тирән кызыксына башлый. Ул һәрвакыт лекцияләргә һәм практик дәресләргә игътибарлы була, шулай ук гинекология өлкәсендәге заманча ысуллар һәм технологияләр турында күбрәк белергә омтыла. Маратның кызыксынулары шулай ук гинекология чикләреннән чыгып китә. Ул актив рәвештә спорт белән шөгыльләнә, бу аңа физик һәм рухи чыдамлыкны сакларга ярдәм итә. Шулай ук фәнни әдәбият уку белән мавыга, ә бу аңа, үз чиратында, дөньяны киңрәк күрергә һәм шәхес буларак үсеш алырга мөмкинлек бирә. Үзенең белемнәрен киңәйтү һәм тикшеренүләре белән уртаклашу өчен төрле фәнни конференцияләрдә һәм семинарларда актив катнаша.  Аның казанышлары санап бетергесез: университетның фәнни, спорт, иҗтимагый һәм мәдәни тормышының активисты, медицина университетлары студентлары өчен Сәмәрканд-2020 халыкара олимпиадасында акушерлык һәм гинекология юнәлеше буенча җиңүче,  РИНЦ үзәге базасына кергән журналларда фәнни басмалар авторы, Смоленск шәһәрендә үткән “XXI гасыр фәненең актуаль проблемалары: көзге марафон” халыкара катнашында XI Бөтенрусия студентлар һәм яшь галимнәр фәнни-гамәли конференциясенең II дәрәҗә дипломанты, “Акушерлык һәм гинекология” секциясендә теоретик һәм практик медицина мәсьәләләре буенча 88нче Бөтенрусия студентлар һәм яшь галимнәр фәнни конференциясенең II дәрәҗә дипломанты, акушерлык һәм гинекология буенча студентларның вуз эчендәге олимпиадасы призеры,  БДМУның беренче акушерлык һәм гинекология кафедрасының фәнни түгәрәге старостасы, “Фән – ул гади” студентлар фәнни хәрәкәтенең төбәк акселераторында катнашучы, фәнни-гамәли конференцияләрдә һәм лекторийларда, шул исәптән VI фәнни-гамәли конференциядә “Хатын-кыз сәламәтлеге – милләт сәламәтлеге” репродуктив медицина белгечләренең дисциплинаара ассоциациясе “Марс” эгидасы астында катнашучы, университет җыелма командасы лидеры, Русия чемпионы һәм чаңгы узышлары буенча Русия медицина һәм фармацевтика вузлары арасында Русия чемпионаты призеры... Бу әле бөтен исемлек тә түгел.
Якташыбыз беркайчан да алдына куйган мотивациясен югалтмый. Башкаларга булышып һәм дөньяны яхшырак итәргә омтылып яшәүне хуп күрә егет. Ул һәрвакыт алга карый һәм үз көченә ышана.
Марат репетиторлык белән дә шөгыльләнә. Булдыклы егет бар эшкә  вакыт та таба, җитешә.
Марат белән күрешә алмасак та, телефон аша элемтәгә кереп сөйләштек. Әңгәмәбезне тәмамлаганда ул үз укытучыларына рәхмәтен җиткерде. Әнисенә, дәү әтисе белән дәү әнисенә дә ярдәмнәре, таянычлары өчен рәхмәтенең чиксезлеген белдерде. 
Марат Шафыйков – профессиональ һәм шәхси үсешкә омтылучы гына түгел, ә башка кешеләргә ярдәм итү өчен мөмкин булганның барысын да эшләүче студентның ачык мисалы. Аның эшчәнлеге, максатчанлыгы һәм кайнап торган дәрте киләчәктә абруйлы  искиткеч табиб һәм медицина җәмгыятенең намуслы әгъзасы булырга вәгъдә итә.

Фото шәхси архивтан.