Алар истәлеге мәңгелек булсын

Бу стендларны эшләтү инициативасы – район үзәк дәваханәсе ветераннар советы рәисе Венера Хәмитованыкы икән. Аның биатасы Радис Саһман улы Хәмитов озак еллар фтизиатр булып эшләгән, иптәше Ирек Радис улы – невролог, табиблар комиссиясе рәисе. Стендларны булдыру да Венера Марс кызының иптәшенең туганнарының, хезмәттәшләренең хәтерен яңар-ту уңаеннан эшләнгән эш.

– Яшь чакларда хирурглар Әнүәр Рафрим улы Баһманов, Зөфәр Хәмәтҗан улы Хәмәтҗанов, Фәрит Кәрим улы Миңнегалиев, Камил Галихан улы Гарипов белән бергә эшләдек. Камил Галихан улыннан башка барысы да бу дөньяда юклар инде.

Район халкына күпме изгелек күрсәткән, күпме кеше гомерен саклап калганнар бит алар... Остазларым, әти, әтинең икетуганнары табиблар Марат Гафур улы һәм Айрат Гафур улы Хәмитовлар хәтерләренә шушы стендларны булдыру уе белән башланган эш иде бу. Дәваханәнең профсоюз рәисе Инга Валерьевна Красильникова белән баш табиб Радик Әнвәр улы Хәсәнов ярдәмендә бу изге эшне башкарып чыктык. Инга Валерьевна, күпбалалы яшь ана булуына карамастан, профсоюз эшен актив алып бара. Безнең идеяләрне гел хуплап чыга ул. Аның энергиясе ташып тора, бер эштән дә баш тартмый, аның белән эшләү – бик уңайлы. Стендлар эшләүдә бөтен табиларның да үзләре яки туганнары белән сөйләшеп, фотолар эзләдек, яңарттык. Берсе дә баш тартмады, риза булып ярдәм иттеләр, рәхмәт барысына да. Шушы шәфкать тулы йөрәкле табибларның хәтерләре югалмасын, кылган изгелекләре онытылмасын иде. Безнең буын исән чакта, карап, искә алып үтү өчен эшләнгән стендлар ул. “Кара әле, бу табиб мине дәвалаган иде”, – дип үтүчеләр дә булыр дип ышанам. Монда барысы да көчле, игелекле табиблар иде. Фәния Мостафа кызы Гарипова күп еллар поликлиника мөдире булып эшләде. Флория Гата кызы Мортазина – гадел инфекционист булды. Лүция Кави кызы Җиһаншина күптән түгел генә шәм кебек янып сүнде. Барысын да әле әйтеп бетереп булмас. Дәваханә хезмәткәрләре генә түгел, дәвалану алырга килгән һәрбер кеше күреп-белеп торыр дип ышанам, – диде Венера Марс кызы, үзенең уй-кичерешләре белән бүлешеп.

Чынлап та, безнең сәламәт-лелегебез иң беренче үзебезнең кулда булса да, авырып китсәк, ярдәм сорап табибларга барабыз. Аларның профессиональлеге аркасында гына күпме гомер сакланып калган, ничәмә кешегә яшәү дәрте кайтарганнар алар. Стендлар эшләү – мәрхәмәтле табибларны искә алу, хөрмәтләүнең йөздән бер өлеше генә.

Һәрбер оешмада үз ветераннары, алдынгы хезмәткәрләре бар. Район үзәк дәваханәсе тәҗрибәсе буенча аларда да шундый хәтер тактасы, почмагы булдырсыннар иде.