+30 °С
Болытлы
Мәдәният
28 декабрь 2023, 04:18
Менә ичмасам бүләк
Якташыбыз, Русия Федерациясе һәм Башкортстан Республикасының Язучылар һәм Журналистлар берлекләре әгъзасы, бүгенге көндә Бустанай авылында яшәп иҗат итүче шагыйрә Рафига Усманова Бейбарс солтанның тууының 800 еллыгына, Казахстан белән Мисыр арасында дипломатик мөнәсәбәтләр булдыруның 30 еллыгына багышланган “Литературная Азия – 2023” Халыкара конкурсының “Поэзия” номинациясендә Гран-при яулады һәм конкурсның Дипломы, Халык дипломатиясенең халыкара бердәмлеге медале белән бүләкләнде. Конкурста барлыгы 63 телдә язган 400дән артык әдәбиятчы катнашкан.
Менә ичмасам бүләк
Бу югары бүләкләрне Рафига Карам кызына конкурсның жюри әгъзасы, БРның халык язучысы, Дуслык ордены кавалеры Марсель Сәлимов тапшырды.
Шулай ук шагыйрәнең янә бер сөенече белән уртаклашабыз. Үтеп барган Кече Ватанга игелекләр кылу елына багышлап махсус нәшер ителгән чираттагы “Туган җирем – туар җырым” дип аталган шигырьләр җыентыгы дөнья күрде аның. “Шигырьләремдә – кендек каным тамган илаһи җиргә чиксез мәхәббәтем”, – ди ул үзе бу җыентыгы турында.
Бүләкләрегез белән котлыйбыз, Рафига Карам кызы, һәм яңадан яңа иҗади уңышлар телибез!
