+30 °С
Болытлы
Батырлар дәвере
7 Май 2025, 06:00
Онытмыйбыз сезне, егетлəр...
30 апрель көнне Яңа Тазлар авылы мəктəбендə “Герой парталары” ачылу тантанасы үтте. Бу парталар шушы мəктəпне тəмамлаган махсус хəрби операциядə батырларча һəлак булган Ленар Бəдертдинов белəн Азат Дəүлəтов истəлегенə багышлана. Укытучылар, укучылар, Ленар белəн Азатның туганнарын һəм якыннарын, район хакимияте, мəгариф бүлеге, “Сугышчан туганлык” Бөтенрусия ветераннар иҗтимагый оешмасы вəкиллəрен бергə җыйды бу чара.
Герой партасын ачу – хөрмəт күрсəтү генə түгел, ул барыбызга да батырлык, фидакарьлек һəм Ватанга мəхəббəт турында искə төшерү. Бу – тарихка кагылу, якташыбызның тормышы һəм батырлыклары турында белү, аның үрнəгеннəн илһам алу мөмкинлеге.
“Герой парталары” артына утырырга иң беренче аның якыннарына рөхсəт иттелəр.
– Халык үзенең геройларын белергə тиеш, – диде район хакимиятенең эшлəр белəн идарə итүчесе Фəрит Хуҗин. – “Геройлар партасы” ватанпəрвəрлек тəрбиялəүдə зур роль уйный.
Килəчəктə “Герой парталары” артында утыру хокукы мəктəпнең иң яхшы укучыларына, укуда, спортта һəм иҗтимагый тормышта уңышларга ирешкəннəргə бирелəчəк.
