Исән-сау кайтыгыз!

Районыбызның кыю ир-егетләре, батыр уллары махсус хәрби операция башланган беренче көннәрдән үк ил алдындагы бурычны  үтәүгә җаваплы карадылар. Бүгенге көндә 300дән артык якташыбыз яу кырында. Мобилизация чикләрендә чакырылганнар, хәрби офицерлар үз Ватанын саклауда көч салалар. Алар бездә горурлык кына уята. Үз теләге белән контракт төзеп китүчеләр ватанпәрвәрлекнең чын үрнәге. 

Өченче апрель көнне махсус хәрби операция зонасына үз теләге белән  барган  дүрт батыр райондашыбызны озаттылар. Бу сугышчылар, Ватанга хезмәт итү юлын сайлап, батырлык күрсәттеләр.

Район мәдәният йорты каршындагы мәйданга батырларның туганнары, якыннары һәм дуслары җыелды.

“Без якташларыбызга тыныч тормышыбызны сакларга батырчылык иткәннәре өчен рәхмәтле. Аларның һәрберсе, үз иленең чакыруына җавап биреп, мөһим адым ясады. Якташларыбызның Ватанны сакларга әзер булуы тирән ихтирам һәм горурлык уята. Без сезгә ышанабыз һәм тизрәк исән-сау һәм җиңү белән өйгә кайтуны көтәбез!”  – дип белдерде үзенең социаль челтәрләрендә район хакимияте башлыгы Рушан Гәрәев.