Борай халкы Бөек Җиңү көнен бәйрәм итте

Чарада катнашучылар — Бөек Ватан сугышы ветераны Заһит Әхтәриев, район хакимияте башлыгы Рушан Гәрәев, аның урынбасарлары, авыл биләмәләре башлыклары, рәсми кунаклар “Сагышлы ана” һәйкәленә чәчәкләр салдылар.
Тантанада катнашучылар Бөек Ватан сугышы фронтларында һәлак булган, туган җирен фашист илбасарларыннан коткарган өчен гомерләрен биргәннәрне бер минут тынлык белән искә алдылар.
–Илебездә бүген дә тыныч түгел. Ике йөздән артык борайлы бүген дәү әтиләре узган юлга бастылар. Халкыбызның язмышы ышанычлы кулларда. Без аларга ышанабыз, – диде Рушан Кадим улы тәбрикләү чыгышында.

Ветераннарның район советы рәисе Фирдус Садретдинов, сугыш чоры балалары исеменнән Люция Каюмова, "Сугышчан туганлык" республика берләшмәсенең район бүлекчәсе идарә җитәкчесе Илгиз Вәлинуров һәм киләчәк буын вәкилләре исеменнән Данир Шакиров борайлыларны, кунакларны котлап, илебездә тынычлык булуын теләделәр.