Кышкы спорт сезоны ачылды

Спортчыларны кышкы сезон ачу уңаеннан муниципаль район хакимияте башлыгы урынбасары Николай Хаматдинов котлады, районда спорт белән шөгыльләнү өчен барлык уңайлыклар барлыгын әйтеп узды.

35 яшькәчә хатын-кызлар арасында финиш сызыгын беренче булып – гимназия укытучысы Ленара Ситдикова, ир-егетләрдән мәгариф бүлеге хезмәткәре Айрат Галиев узды. Артабан 50 яшькәчә төркемдәге хатын-кызларга старт бирелде. Бу яшь төркемендә беренчелекне беренче мәктәп укытучысы Алиса Тимиряева алды. Яңа Тазлар укытучысы Айрат Садыйков ир-егетләр арасында пьедесталның беренче бас-кычына күтәрелде. 50 яшьтән өлкәнрәкләр арасында үзәк дәваханә хезмәткәре Фидания Закирова һәм Ваныш мәктәбе укытучысы Венер Арслановка тиңләшүче булмады. Командалар арасында беренче урынны – район хакимияте, икенчене – район үзәк дәваханәсе, өченче урынны гимназия яулады.

8-9 класс укучылары арасында кызлардан беренчелекне Гөлназ Миңнуллина (Ваныш), егетләрдән Әнүр Сафин (Яңа Тазлар) яулады. Гомум зачет нәтиҗәләре буенча беренчелеккә – Ваныш мәктәбе, икенче урынга – Яңа Тазлар, өченчегә Зур Шөкшән мәктәбе командалары лаек булды.

Ә 10-11 класслар арасында беренчелеккә кызлардан Зур Шөкшән мәктәбе укучысы Арина Минлина, егетләрдән шул ук мәктәптән Айнур Латыпов чыкты. Беренче урынга Зур Шөкшән, ә икенчегә – гимназия командасы лаек булды.

Призерларга – Мактау грамоталары, ә җиңүче командаларга кубоклар тапшырылды.