Лаборант егет Владимир

Һәр авыл хуҗалыгы предприятиесе өчен продукциянең сыйфатын арттыру беренчел әһәмияткә ия. Сөтнең сыйфатына игътибарлырак булу, конкурентлыкка сәләтле продукция чыгару – бу бүгенге көннең бурычы. Шуңа күрә районыбызның авыл хуҗалыгы предприятиеләрендә җитештерелә торган продукциянең сыйфатын контрольдә тоту бик мөһим. Сөт, безнең өстәлгә кергәнче, катлаулы техник эшкәртү юлын уза. Барлык этапларда да лаборатория анализына һәм чималның да, әзер продуктның да сыйфатын контрольгә алуга аерым игътибар бирелә. Бу катлаулы системада беренче булып авыл хуҗалыгы оешмасы лаборанты тора. Мондый белгечсез бер генә хуҗалык та эшләми. Сөтне заманча һәм сыйфатлы анализлау нәтиҗәсендә хуҗалыкта хайваннарны ашатуда һәм карауда кимчелекләр билгеләргә һәм теге яки бу товарлыклы сөтчелек фермасы эшенә тиешле төзәтмәләр кертергә мөмкин. Шуңа күрә лаборантның хезмәте авыл хуҗалыгы предприятиесендә әһәмиятле, һәм хуҗалыкның мондый белгече гомуми эшкә зур өлеш кертә.
Владимир Янсубаев, “Колос” хуҗалыгы лаборанты, үз эшен җентекләп белә. Күптән түгел генә бу эшкә башласа да, ул үзенә йөкләтелгән бурычны намус белән башкара, лаборатория тикшеренүләре өлкәсендә игътибарлылык, чисталык һәм тирән белем таләп итә торган бу катлаулы белгечлекнең барлык нечкәлекләрен өйрәнә.
Владимир “Колос” хуҗалыгында хезмәт юлын ун ел элек башлап җибәрә. Төрле эшләрдә үзен чыныктырып, лаборант дәрәҗәсенә күтәрелә. Аның эш урынында чисталык хөкем сөрә. Лаборатория кирәкле приборлар һәм реактивлар белән җиһазландырылган. Яңа савылган сөтне лаборант тиз генә анализлый. Гадәти, эшкәртелгән хәрәкәтләр белән сөтне үлчи, аны фильтр аша үткәреп, документлар тутыра. Анализлау тәмамлангач, лаборант лаборатория приборларын чистарта, дезинфекцияли башлый.
– Минем эш көнем нормалаштырылмаган, – дип сөйли башлады Владимир үз эше турында. – Кирәк булса, иртәнге биштә дә савымчылар белән бергә киләм. Кичке савымны да контрольдә тотам, лабораториядә приборларны юарга кирәк. Шуңа эштән соң кайтам. Анализ өчен һәр партияне аерым алам. Аларның майлылык, тыгызлык, чисталык, кислоталылык дәрәҗәсе, температура, сөтнең сортлылыгын билгеләүче күрсәткечләрен карыйм. Сөтнең нинди сортлы булуына карап, сату бәясе дә шундый булачак, ә бу, сез аңлаганча, безнең авыл хуҗалыгы предприятиесенең икътисади күрсәткечләренә тәэсир итә. Сөтнең һәр партиясен чисталыкка тикшерәм.
Хәзерге стандартлар бик катгый һәм моны Владимир бик яхшы аңлый, шуңа күрә пөхтәлек, башкаручанлык һәм җаваплылык буенча ул үзенә һәм ферма хезмәткәрләренә карата таләпчән. Лаборатория хезмәткәре сөтнең сыйфатына, нигездә, кеше факторы тәэсир итә дип саный.
Авыл хуҗалыгындагы һәр хезмәтне җиңел дип атап булмый, шуңа күрә монда бернинди кыенлыклардан курыкмаган, үз һөнәрләренә, тугры кешеләр эшли.