+30 °С
Болытлы
Авыл хуҗалыгы
31 Май 2021, 10:10
Печән әзерлиләр, сенаж салалар
Алдагы кышлату чорында малларны җитәрлек күләмдә яхшы сыйфатлы азык белән тәэмин итү өчен районның авыл хуҗалыкларында хезмәт фронтын киң җәелдереп эшлиләр. Әлеге вакытка районда 22000 гектар мәйданда химик утау һәм 2800 гектар мәйдан корткычларга каршы эшкәртелгән. Чәчү эше белән беррәттән районның күп кенә хуҗалыклары мал азыгы әзерләү эшләренә дә тотынды. Мәсәлән, Ленин исемендәге, "Салават", "Колос" хуҗалыкларында бу мөһим кампания кызу темпта башланды. 1200 гектар мәйданда күпьеллык үләннәр чабылган. 31 майга 300 тонна печән, 800 тонна сенаж әзерләнгән. Шулай ук 2800 гектар мәйданда 2022 ел уңышын җыю өчен пар басуларын эшкәртү эшләре башкарылган.
"Салават" хуҗалыгында озак еллар механизатор булып хезмәтен салган Вәрис Гыйлемшин "МТЗ-82" тракторында махсус чапкыч белән кәҗә үләнен тезмәләргә сала. Аның артыннан ук басуга мал азыгы әзерләү комбайны килеп, яшел массаны җыеп, йөк машиналарына төйи. Әзер массаларны траншея салып, тыгызлап баралар. Хуҗалыкның икенче басуында шушы ук культураны МТЗ-80 тракторында Радик Солтанов җыйнап, рулоннарга кысып бара. Салаватлылар мал азыгы әзерләүдә комплекслы эшлиләр.
–Үлән яхшы булгач, эшләве дә рәхәт, бер әйләнүгә исләре борыннарны кытыклап торган яшел масса,"ә", дигәнче йөк машиналарын тутыра, – ди Ранис Мөхәмәтнуров.
Ранис "Салават" хуҗалыгында терлек азыгы әзерләү белән икенче ел мәшгуль. Әлеге хуҗалыкта "Полесье" мал азыгы әзерләү комбайнын йөгәнли. Техника иярләүдә осталыгы, тәҗрибәсе җитәрлек аның.
Яшел массаны басу-кырлардан Тукран авылының ферма янындагы траншеясына "КамАЗ" машинасы белән Салават Шәйхлисламов, "Т-150" тракторында Радик Әхмәдишин ташып тора.
