+24 °С
Дождь
Җәмгыять
20 Мая 2021, 11:20
Армиядә хезмәт итү – егетлек билгесе
Бүгенге көндә илебезнең төрле почмакларында Борай районыннан 100гә якын егет хезмәт итә. Аларга тыныч хезмәт итәргә, туган йортларына исән-сау әйләнеп кайтырга язсын, әти-әниләрен, якыннарын яхшы хәбәрләр белән генә шатландырсыннар.Денис Дүсмәтов – Борай егете. Бәләкәйдән үк спортны үз иткән малай ныклап футбол белән шөгыльләнә башлый.
Физик яктан көчле, чыдам Денис мәктәптә укыганда ук, спорт ярышларында катнашып, төрле дәрәҗәдәге дипломнарга лаек була. М. Акмулла исемендәге башкорт дәүләт педагогия университеты колледжына укырга керә, физик әзерлек буенча педагог һөнәре ала. Студент елларында “Уфа” футбол командасында уйный ул. Соңгы курста укыганда тренер булып та эшли. Узган язгы чакырылышта армия сафларына үзе теләп китә Денис. Солдат формасы киюенең беренче көннәреннән үк ул үзен үрнәк итеп күрсәтә.
Денис Чибәркүл шәһәрендәге 90нчы гвардия ике тапкыр Кызыл Байрак Витебск-Новгород танк дивизиясендә спорт ротасында хәрби бурычын үти.
Авыл һавасын сулап, җир сулышын тоеп үскән егет хәрби хезмәттә дә үзен сынатмый. Ул хезмәтеннән зарланмый, аңа солдат тормышы ошый, һәр егет солдат мәктәбе үтәргә тиеш дип саный Денис. Мәкаләмне әзерләгәндә, гаиләсенә куанычлы хәбәр килә – батальон командиры Дениска кече сержант званиесе бирү турында рапортка имзасын куйган.
Солдат мәктәбен горур узып, кече сержант Денис Дүсмәтовны туган якка исән-сау кайтуын әтисе, туганнары көтеп кала.
