Сынатмагыз, егетләр!

Борай авылыннан Тимур Сахаутдинов, Дамир Дәүләтгәрәев, Иске Мостафадан Заһиров Вадим, Александр Самиев, Кузбайдан Тимур Нургалиев, Бустанайдан Илнар Насыйбуллин, Шабайдан Юрий Гайниев, Мамадыдан Дмитрий Мухаметзянов, Яңа Шилектән Ринат Әхкәмовларны район хакимиятенең гражданнар оборонасы һәм гадәттән тыш хәлләр мәсьәләсе секторының мөдире Наил Әхмәтгалиев үзенең тантаналы чыгышы белән сәламләде. Солдат хезмәтен үтәү һәр егет кешенең илебез алдындагы җитди, җаваплы бурычы икәнен әйтеп, ул аларга ак юл теләде. “Армиядән егетләр чын ир-ат булып, ныгып, чыныгып кайта, илебезнең иминлеге сезнең кулларда. Без барыбыз да горурланырлык солдат булырсыз, дип ышанабыз” – диде ул аларга. Мишкә һәм Борай районнарының хәрби комиссариаты вәкиле Эльмира Габделхакова егетләргә хәрби билет таратып чыкты. Алар шушы минуттан Ватаныбызның хәрбиләренә әйләнде. Киләчәктә бу билетларга бары хуплаулар, мактаулар гына язылсын! Сынатмагыз, якташларыбыз! Исән йөреп, сау кайтыгыз, берүк, егетләр!

Миләүшә Әхмәтҗанова.