Иңнәрендә пар канат

Әйе, мин табиб булыр идем, дигән уй һәрберебезнең балачакта күңеленә кереп калгандыр. Мөгаен, һәрбер кеше иңнәренә ак халат салып, кешеләрне терелтеп йөрүләрен күз алдына китереп үскәндер. Ләкин, үсә төшкәч, бу һөнәрнең ни дәрәҗәдә җаваплы булганын аңлыйсың һәм әллә башка һөнәр сайларга микән, дигән шикле уйлар уйларга мәҗбүр буласың. Минемчә, теләгең булса, бу һөнәр алдында булган җаваплылык та, бу һөнәрнең авырлыгы да киртә булып тора алмыйдыр. Бүгенге көндә район үзәк дәваханәсендә хезмәтен салучы акушер-гинеколог, табиб Лилия Фәязова бу һөнәрне сайлап ала алуы белән бәхетле. Югары уку йортын тәмамлап, район дәваханәсенә эшкә кайткан кыз шактый эш тәҗрибә туплап, бик күп пациентларга ярдәм итеп, үз эшенә җаваплы караган табибәләрнең берсе. Хезмәтен җаваплылык белән башкарган Лилия Илмир кызын район дәваханәсенең медицина җитәкчесе итеп тәгаенлиләр. Бу вазыйфасын да ул бик яратып башкара.