Тыныч күк – сезнең өлеш

19 февраль көнне район мәдәният йортында “Төрле буын ир-атларына” дигән Ватанны саклаучылар көненә багышланган концерт оештырылды. Бирегә Бөек Ватан сугышында катнашучылар, тыл ветераннары, муниципаль район хакимияте вәкилләре, районыбызның оешма-предприятиеләрендә эшләгән ир-атлар, тамашачылар җыелды. Мишкә һәм Борай районнары хәрби комиссары Сергей Васильев барлык ир-атларны бәйрәм белән тәбрикләде. «Русия Кораллы Көчләренең тарихы бик бай. Егетләргә хәрби-патриотик тәрбия бирү буенча да районда даими рәвештә төрле чаралар, сугыш ветераннары белән очрашулар үткәрелеп тора. Үзләрен Ватанны саклауга багышлаган ир-егетләрне, хөрмәтле ветераннарыбызны чын күңелдән бәйрәм белән котлыйм, киләчәктә иминлек, оптимизм, сәламәтлек телим»,–диде ул. Концерт барышында тамашачыларны Ватанны саклаучылар көне белән тәбрикләү өчен Дәүләт Думасы депутаты Илдар Бикбаев та сәхнәгә күтәрелде. «Ватан азатлыгын саклау илебезнең һәр кешесенең изге бурычы булып кала. Менә 103 ел безнең Кораллы Көчләр Ватаныбыз сагында тора. Һәр ел яшь якташларыбыз Русия Федерациясе Кораллы Көчләрендә сынау үтә, аларның һәркайсы әтиләре һәм бабаларының изге традициясен лаеклы дәвам итә. Без барыбыз да аларның исән-сау, көч һәм сәламәтлек туплап, яңа һөнәрләр үзләштереп кайтуларын телибез. Барыгызга да ныклы сәламәтлек, имин тормыш телим»,–диде Илдар Зинур улы. Ул төрле елларда Ватанга тугрылыкка ант бирүчеләрне, армиягә китәргә әзерләнүчеләрне һәм хәзерге вакытта сроклы хезмәт узучыларны котлап, ветеран-интернационалистларга һәм яшьләргә патриотик тәрбия бирүдә актив катнашучыларга РФ Дәүләт Думасының Рәхмәт хатларын тапшырды. Алар Ватаныбызга булган мәхәббәтләрен һәм яшьләргә патриотлылыкның нинди булуын күрсәтү максатыннан хәрби киемнәрдән килгәннәр иде.